Evi Kokalari, e cila një ditë më parë prezantoi lëvizjen konservatore, në studion e Euronews Albania, ka rrëfyer momentet që ajo është zhgënjyer nga ish-Kryeministri Sali Berisha.
E ndërsa për muaj me rradhë u shfaq në krah të Berishës, ishte pjesë e Kuvendit të 11 dhjetorit 2021 ku u vendos Rithemelimi, ishte një nga 29 emrat që vepruan si një Komision Drejtues, Kokalari kundërshtoi disa nga zhvillimet në këtë proces, si në zgjedhjen e piramidës drejtuese, ashtu edhe përsa i takon kreut të FRPD.
“Koalicioni me Metën “i vuri kapakun” besimit tim te Berisha”, tha Kokalari, sipas të cilës askush nga demokratët nuk e donte një koalicion me Ilir Metën.
Por sipas Kokalarit, momenti kur ajo vërtet e humbi tërësisht besimin te Sali Berisha ishte kur ai ftoi në zyrë menjëherë pas forumit rinor, Besart Xhaferin, duke treguar kështu se ai ishte dakord që Xhaferi të vendosej në krye të forumit, ndërkohë që sipas Kokalarit, ajo dhe të tjerë nga strukturat e PD nuk u dëgjuan fare në lidhje me ankimet që kishin për kreun e ri të forumit rinor.
“Koalicioni me Metën i vuri kapakun, sidomos kur ky humbi vulën në gjykatë; ky nuk dëgjoi opinionin e demokratëve por i çoi nën logon me Ilir Metën. Kjo i vrau shumë demokratët, të gjithë dhanë mbështetjen por asnjëri nuk donte një koalicion me Metën.
Momenti që vendosa se e kam humbur besimin komplet, ishte momenti që ky ka dalë në mëngjes pas forumit rinor dhe ftoi Besart Xhaferin në zyrë, pa mbaruar, ndërkohë që pjesa tjetër po sillnin ankimet dhe problemet që kishim, por ai e mbylli garën.
Ai ka qenë lider për një kohë shumë të gjatë dhe nuk duhet ta kishte lejuar. Aty filloi zhgënjimi total, se deri në atë moment po mundohesha të thoja shiko se ç’po ndodh me forumin rinor”, tha Evi Kokalari.
Discussion about this post