Pakënaqësitë për reformën territoriale po shfaqen edhe brenda Partisë Socialiste.
Pas kritikave të Erion Braçes, deputeti Fadil Nasufi ka kundërshtuar bashkimin e Dimalit dhe Poliçanit me Beratin, por ka deklaruar se do ta votojë draftin.
Qëndrimi i tij vjen në të njëjtën ditë kur Edi Rama, në mbledhjen e grupit parlamentar, paralajmëroi se kush voton kundër, më mirë të largohet.
Pas Erion Braçes, një tjetër deputet socialist ka dalë publikisht me kritika ndaj hartës së re territoriale.
Deputeti i qarkut të Beratit, Fadil Nasufi, ka shprehur pakënaqësi për mënyrën se si është konceptuar ndarja e re administrative, veçanërisht për bashkimin e bashkive Dimal dhe Poliçan me Beratin.
Por, ndryshe nga Braçe, Nasufi ka bërë të qartë se kritikat e tij nuk do të përkthehen në votë kundër.
Nga foltorja e Kuvendit, ai deklaroi se do ta mbështesë draftin, megjithëse pranoi se vendimi ka shkaktuar zhgënjim te një pjesë e banorëve që përfaqëson.
“Unë si deputet i qarkut Berat i kam ndjekur reagimet, refuzimet dhe argumentet kundërshtuese të bashkisë Dimal e Poliçan që i bashkohen Beratit. Realisht prisja një hartë territoriale që e sjell organizimin e pushtetit vendor në kufirin e bashkive metropolitane ose ish-rretheve. Jam i dakordësuar me banorët e Dimalit”, deklaroi Nasufi.
Deputeti socialist ngriti pikëpyetje mbi kriteret e përdorura për bashkimin e bashkive, duke përmendur edhe njësi të tjera vendore që, sipas tij, kanë karakteristika të ngjashme me Dimalin.
“Nuk e kam pse bashkohet Dimali me Beratin, por pse nuk bashkohen edhe bashki të tjera të një tipologjie, ndoshta edhe më të ulët se Dimali, si Roskoveci, Kuçova, Delvina etj. Gjithsesi unë e votoj këtë draft, edhe pse marr mbrapsht shije të hidhur e zhgënjim të shumë banorëve që nuk janë dakord me këtë hartë administrative”, tha ai.
Deklarata e Nasufit vjen në një moment kur reforma territoriale ka nxjerrë në pah pakënaqësi edhe në radhët e mazhorancës.
Kritikat e tij pasojnë ato të Erion Braçes, por mes dy deputetëve ka një dallim në qëndrimin ndaj votimit: Nasufi ka zgjedhur të shprehë rezervat e tij publikisht, pa e kundërshtuar draftin me votë.
Zhvillimet marrin një tjetër peshë pas mbledhjes së sotme të grupit parlamentar socialist, ku kryeministri Edi Rama u ka bërë të qartë deputetëve se kush nuk është dakord të votojë reformën, më mirë të largohet.
Discussion about this post