Fakulteti i Historisë ka rihapur këtë vit shkollën verore të gjuhës, historisë dhe civilizimit bizantin. Historia e gjuhës dhe shkrimit grek bizantin, kodikët, arbrit gjatë bizantit janë pjesë e programit
Sabri Laçi, dekan i Fakultetit të Historisë dhe Filologjisë, thotë se “ka pasur një interes te madh. Pjesë e kësaj shkolle veç studentëve tanë kanë qenë edhe punonjës të Akademisë së Arteve, Muzeut Historik Kombëtar apo Institutit të Monumenteve. E po ashtu, ka pasur edhe studentë nga Kosova”.
Shkolla verore rivjen pas një viti mungesë për shkak të pandemisë duke ngjallur shumë interes.
Shefja e Departamentit të Historisë, profesoreshë Valentina Duka, duke falënderuar këdo që e bëri të mundur, thotë se aplikimet jane rritur ndjeshëm.
“Shkolla verore për gjuhën, kulturën e historinë e Bizantit është kthyer tashmë në një institucion. Ka aktualisht, 140 aplikime për 40 vende. Leksionet jepen në arkiva, muze dhe ka edhe vizita në terren të kësaj trashëgimie”.
Profesor të njohur dhe specialistë të fushës do te japin leksioni intensive në një javë.
Andi Rembeci, Drejtor shkencor i shkollës verore, thotë se në këtë shkollë, Bizanti vjen i analizuar ne hapësirën shqiptare me një program te dedikuar per kulturën, gjuhën dhe dëshmitë e bizantit në Shqipëri.
Ai përmend edhe pjesëmarrjen e Agamemnon Tselikas, një autoritet botëror i Paleografisë dhe Shkolla verore për bizantin mbështetet nga ambasada greke dhe fondacioni Aleksandër Onasis.
