Nënkryetarja e Komisionit të Ekonomisë, Sorina Koti ka bërë me dije se nga dita e hënë PD do të nisë tentativat për të sjellë në Kuvend Autoritetin e Konkurrencës dhe zbuluar arsyet se përse votuan kundër uljes së çmimit të bukës.
Deputetja Koti u shpreh para mediave se Autoriteti duhet të japë llogari para Komisionit dhe para të gjithë shqiptarëve për faljen e gjobës ndaj kompanive që rritën çmimin e bukës.
“Duke parë situatën e vështirë ekonomike, sot PD dorëzoi kërkesën për thirrje në komision ndaj autoritetit të konkurrencës pasi votoi kundër interesit shqiptar për uljen e çmimit të miellit. Cënon interesin kombëtar pasi nuk gjobiti kompanitë që shkaktuan rritjen e çmimit të miellit. Të hënë do bëjmë tentativën që të jenë në parlament. Duam të thërrasim në dëgjesë për të na thënë përse votoi kundër uljes së çmimit të bukës dhe kundër interesit të shtetasve shqiptar. Në kushtet e një mosfunksionimit të tregut ata duhet të ndërhyjnë dhe jo të dëmtojnë qytetarët”, tha Koti.
Ditën e djeshme u bë publik vendimi se Autoriteti i Konkurrencës nuk i ka ndëshkuar importuesit e miellit dhe grurit, pavarësisht se u kapën në shkelje gjatë korrikut të vitit të kaluar. Në këtë raport ishte parashikuar një gjobë 5 milion euro ndaj të pesta kompanive, Agro Blend SHPK, Miell Tirana SHA, Bloja SHA, Atlas SHA dhe Atlas Mills SHPK, por Autoriteti ka hedhur poshtë gjobën me justifikimin se të dhënat nuk lidheshin me realitetin e sotëm.
