DPSHTRR ka pezulluar nga detyra punonjësin e QKT Durrës, pasi dyshohet se ka abuzuar me detyrën. DPSHTRR tregon se personi në fjalë ka bërë falsifikim dokumentesh duke dhënë ën shkelje të ligjit leje për errësim xhamash. Gjithsesi hetimet po vazhdojnë pasi dyshohet se në këtë skemë janë përfshirë dhe persona të tjerë.
“Siç del edhe nga informacioni i bërë publik, ndryshimet dhe masat e marra nga DPSHTRR në 9 Nëntor 2021, mes sistemeve apo lëvizjeve, kontrollit por edhe monitorimit të vazhdueshëm, ua kishin bërë ferr jetën sekserëve por gjithashtu rezulton se duhet bërë më shumë për parandalimin e rasteve të tilla, të bindur se sektorë të tillë janë të ekspozuar ndaj tundimeve e riskut! DPSHTRR po investon të sofistikojmë më tej ndërveprimin e sistemeve mes sektorëve e shërbimeve, të fuqizojmë monitorimin interaktiv dhe auditimin, të forcojmë kontrollin e brendshëm dhe bashkëpunimin me qytetarët për rritje të ndërgjegjësimit dhe transparencës!”, thuhet në njoftim.
Ndër të tjera, theksojnë se për vitin 2021 në rang vendi u kryen 79,758 certifikime për errësim xhamash autoveturash, dhe se çdo goditje ndaj falsifikatorëve, evazorëve dhe çdo spekulimi brenda apo jashtë perimetrit, siç qe rasti i automjetit që nxori hetimi i një dite më parë është një ndihmë e çmuar për DPSHTRR. Ditën e djeshme, në kuadër të operacionit policor të koduar “Xhamat e errësuar” janë ndaluar Qamil Domi, Erjon Rakipllari, Erges Zaka, Yllka Graceni, Artan Frroku, Artan Murati dhe Zef Ndoca.
Ata akuzohen se falsifikonin dokumente për xhamat e zinj të automjeteve. Sipas dosjes që gazetarja Anila Hoxha disponon, më datë 16.11.2021 në Drejtorinë Vendore të Policisë Tiranë është paraqitur bashkëpunëtori i cili ka pranuar kryerjen e veprimeve simuluese dhe në kallëzimin e tij sqaron se shkoi tek Drejtoria Rajonale e Shërbimit të Transportit Rrugor për tu interesuar sa kushton rinovimi i dokumentacionit të mjetit të tij me targe AA535XA pasi ai mund të shkonte jashtë shtetit muajin tjetër dhe makinën do ta përdornin familjarët e tij.
Discussion about this post