Grabitja e dokumenteve të pronësisë në zyrat e Këshillit të Qarkut të Vlorës, e ndodhur 4 ditë më parë ka hedhur hije dyshimi për bashkëpunëtorë të brendshëm në këtë institucion, por hetimet tregojnë se ngjarja është inskenuar si grabitje, pasi zyrtarët kanë dashur të fshehin shkeljet ligjore që kanë bërë me pronat në bregdet.
Në një njoftim zyrtar për shtyp, policia tha sot se tre persona janë ndaluar si të përfshirë në grabitjen e zyrat e pronave të këshillit të qarkut Vlorë. Sipas Policisë Bardhyl Gjika me detyrë Drejtor i Drejtorisë së Administrimit dhe Mbrojtjes së Tokës, pranë Këshillit të Qarkut Vlorë, në bashkëpunim me specialistin e kësaj drejtorie shtetasin Kreshnik Mino, dhe shtetasin Spiro Duni, dyshohen se kanë falsifikuar formularët e AMTP dhe Formularin nr.6 për regjistrimin e një pasurie, në fshatin Dhërmi. Pikërisht për këtë arsye kanë inskenuar edhe grabitjen e zyrave, për të fshehur gjurmët.
Ngjarja ndodhi 4 ditë më parë kur Drejtori i Drejtorisë së Administrimit dhe Mbrojtjes së tokës, në Këshillin e Qarkut të Vlorës, Bardhyl Gjika dhe Kreshnik Mino, dyshohet se inskenuan vjedhjen e disa ditëve më parë të dy AMTP-ve, të pronave të bregdetit konkretisht të fshatit Dhërmi. Burime nga policia sqaruan se një AMTP dhe formulari 6 i regjistrimit të një pronë truall ishim falsifikuar në favor të shtetasit Spiro Duni.
Sipas, të dhënave paraprake çështja e pronësisë e familjes Duni po gjykohet pasi ka pasur pretendime për falsifikime. Dokumentet origjinale janë kërkuar të vihen në dispozicion të organeve të drejtësisë dhe për të mos u zbuluar falsifikimi funksionarët e këshillit të Qarkut, kanë sajuar vjedhjen e tyre. Dokumentet origjinale janë vetëm në këtë zyrë dhe nuk janë administruar nga ASHK.
Vetë Drejtori i Drejtorisë së Administrimit dhe Mbrojtjes së tokës, në Këshillin e Qarkut të Vlorës, Bardhyl Gjika ditën e grabitjes dëshmoi para medies për grabitjen detaje nga grabitja. Dëshminë e plotë e ndiqni në videon e mëposhtme.
Për ngjarjen e rëndë kreu i Këshillit të Qarkut Ervis Moçka ka firmosur pezullimin nga detyra për 2 punonjësit e ndaluar nga policia, Bardhyl Gjika dhe Kreshnik Mino.
