Falsifikuan dokumentet për tokë në bregdet, kush janë 6 të arrestuarit në Himarë

Policia e Himarës ka dhënë detajet zyrtare në lidhje me operacionin e zhvilluar pas hetimit 1-vjeçar të kryer për falsifikimet e dokumenteve shtetërore me qëllim përfitimin e truallit në bregdet.

Gjykata e Vlorës ka lëshuar 22 urdhër arreste për persona, të cilët dyshohen të jenë përfshirë në afera për tjetërsim pronash në bregdetin e Himarës.

Prej tyre, gjashtë janë arrestuar, 8 janë lënë në arrest shtëpie dhe pjesa tjetër po hetohen në gjendje të lirë. Hetimet për tjetërsim pronash janë shtrirë për dokumentacion të lëshuar para 10 vitesh.

Për shtetasit Arqilea Veizi, Spiro Dhima, Serxhio Joshi, Denis Kokaveshi, Vasillo Mëhilli dhe Artur Duni është caktuar masa e sigurisë “arrest me burg”.

Hetimet nisën pas sekuestrimit të dosjeve në zyrën e menaxhimit të pronave dhe aseteve në Këshillin e Qarkut të Vlorës dhe Agjencisë Shtetërore të Kadastrës.