Qeveria vazhdon të jetë me “pushime” sa i takon detyrimeve ndaj popullit, e sikur të mos mjaftonte institucionet abuzojnë me uniformat e tyre në kurriz të tij. Edhe këtë herë banorët e Lumasit kanë bërë një tjetër kallëzim penal në SPAK. Ata akuzojnë për “shpërdorim detyre” Kryeinspektorin pranë IKMT Tiranë, Albert Zybeja, Drejtorin e Mjedisit pranë IKMT qendrore Oen Nallbani dhe Juristet e këtij institucioni Ueda Damiani.
Zyrtarët në fjalë akuzohen nga banorët se kanë falsifikuar të dhënat e paraqitura nëpër procesverbale, me qëllim favorizimin në mënyrë kriminale të kundravajtësve, që në rastin konkret janë bashkia Kuçovë dhe firma Salillari.
Më konkretisht një tjetër kallëzim penal është depozituar në SPAK nga banorët e Lumasit, që prej më shumë se 4-mujsh po luftojnë për të ruajtur të paprekur ujin e burimit të Sinecit. I firmosur nga 123 banorët e Lumasit, kallëzimi penal është depozituar prej tyre dje në Prokurorisë së Posaçme kundër Korrupsionit dhe Krimit të Organizuar (SPAK).
