Familja e Gjovalin Shkambit ka reaguar pas deklaratave kërcënuese të tij ndaj gjyqtarëve, në lidhje me çështjen ku nipi i tij, Elvis Shkambi, akuzohet për vrasjen e gjyqtarit Astrit Kalaja. Në një mesazh publik, familjarët kanë shprehur ngushëllimet për humbjen tragjike dhe kanë kërkuar ndjesë për fjalët e thëna nga babai i tyre, duke theksuar se ato janë bërë në kushte të rënduara emocionale dhe psikologjike.
Në deklaratën e tyre, ata theksojnë se nuk justifikojnë në asnjë mënyrë gjuhën e përdorur dhe se e respektojnë drejtësinë dhe proceset ligjore që po zhvillohen. Ata kërkojnë nga mediat që të tregojnë kujdes me përfshirjen e familjes në trajtimin e ngjarjes, duke nënvizuar se Gjovalin Shkambi është shprehur në një moment të rëndë tronditjeje pas ngjarjes tragjike që përfshiu nipin e tij.
Ngjarja e rëndë ndodhi pas një seance gjyqësore në Apelin e Tiranës, ku gjyqtari Astrit Kalaja kishte dhënë vendimin kundër palës së përfaqësuar nga Elvis dhe Gjon Shkambi. Menjëherë pas shpalljes së vendimit, Elvis Shkambi ka qëlluar për vdekje gjyqtarin Kalaja, ndërsa ka plagosur edhe dy persona të tjerë, babë e bir nga pala kundërshtare, të cilët ndodhen jashtë rrezikut për jetën në Spitalin e Traumës.
Discussion about this post