Aktivistët e Koalicionit Shqiptar Pro Familjes dhe Jetës ka dalë sërish pasditen e kësaj të premte në protestë për të kundërshtuar projekt ligjin për shëndetin riprodhues, që i hap rrugë abortit dhe surrogacisë. Anëtarë të koalicionit por dhe qytetarë janë mbledhur sërish në sheshin Skënderbej me pankarta në duar teksa shprehin shqetësimin e tyre për këtë projektligj që sipas tyre nuk është i drejtë.
Ata shprehen se Shqipëria nuk është gati për surrogacinë, pra për të bërë një marrëveshje ligjore ku një grua pranon të lindë një fëmijë në emër të një personi tjetër që kërkon të bëhet prind. Drafti parashikon edhe riprodhimin in vitro dhe qartëson procedurat e aborteve në Shqipëri, gjë për të cilën qytetarët gjithashtu kanë shprehur mosdakordësinë e tyre.
Por përpos këtij projektligji aktivistët kanë dalë për të kundërshtuar edhe martesën brenda së njëjtës gjini, referuar ceremonisë që u zhvillua pak ditë më parë në tarracën e Bashkisë së Tiranës, ku dy vajza të komunitetit LGBT+ u martuan me njëra-tjetrën.
Me pankarta ku shkruhet “Mos deformonin termin Familje”, “Jo mitrës me qira” dhe “Shqiptari njeh babë e nënë, jo prindi 1 dhe prindi 2”, qytetarët kanë shprehur revoltën e tyre kundrejt martesës së të njëjtës gjini dhe projektligjin për shëndetin riprodhues. Kjo është protesta e dytë që zhvillohet për të njëjtën aryse. Një tjetër protestë u mbajt ditën e djeshme në sheshin Skëndërbej, ku mes protestuesve kishte edhe të rinj.
Discussion about this post