Familjarët e Jani Rustemaj, i cili humbi jetën në rrethana ende të paqarta, protestuan sot para Ministrisë së Drejtësisë, duke kërkuar zbardhjen e ngjarjes.
Rustemaj, 27 vjeç, u arrestua nga policia në 12 prill për veprën penale të vjedhjes, por dy ditë pas ndalimit, shfaqi një gjendje të rënduar shëndetësore, ndërsa u shtrua për ndihmë mjekësore në QSUT.
Prej datës 17 prill deri në momentin kur ndërroi jetë, Rustemaj ndodhej në gjendje kome. Prokuroria e Tiranës ka nisur hetimet lidhur me ngjarjen, ndërsa familjarët e 27 vjeçarit kanë hedhur akuza ndaj Policisë për dhunë të ushtruar ndaj tij.
“Duam drejtësi. Kush e ka rrahur, kush e ka nxirë nga policia. Ka pasur shenja dhune. Ishte i nxirë nga trupi, te këmbët. Ia kishin thyer këmbët. Me dru ia kishin thyer këmbët”, u shpreh një prej të afërmve të Rustemajt, gjatë protestës së zhvilluar.
Ndërkohë nëna e 27-vjeçarit tha se drejtësia duhet të zbardhë ngjarjen.
“Ma morën djalin si kokra e mollës dhe ma sollën me arkivol. Ne dyshojmë për dhunë”, tha ajo.
Nëna e tij ka deklaruar se i biri u arrestua për vjedhjen e një palë atleteve dhe një tapeti.
Discussion about this post