Kryetari i Grupit Parlamentar të Partisë Demokratike, Gazment Bardhi, ka reaguar me akuza të forta ndaj zv.kryeministres Belinda Balluku, duke e lidhur atë drejtpërdrejtë me aktet e presionit të ushtruara ndaj familjarëve të kandidates së PD-së në Fier, Silva Hasaj.
Në një deklaratë publike, Bardhi dënoi ashpër atë që e cilësoi si “intimidim politik” të organizuar përmes Policisë së Shtetit, duke e konsideruar këtë një përshkallëzim të rrezikshëm të përpjekjeve për të frikësuar qytetarët dhe për të deformuar vullnetin e tyre.
Sipas Bardhit, përdorimi i Policisë së Shtetit si instrument politik nën urdhërat e Ballukut dhe Kryeministrit Edi Rama përbën një kërcënim serioz ndaj demokracisë dhe stabilitetit në vend. Ai paralajmëroi se këto veprime nuk do të mbeten pa pasoja dhe theksoi se askush, përfshirë drejtuesit më të lartë politikë, nuk është mbi ligjin.
Në përfundim, Bardhi i bëri thirrje OSBE/ODIHR dhe institucioneve të tjera ndërkombëtare të monitorojnë nga afër sjelljen e Policisë gjatë procesit zgjedhor, duke kërkuar mbrojtjen e standardeve demokratike.
Reagimi i plotë:
Dënoj me forcë çdo akt presioni dhe intimidimi që Policia e Shtetit, nën ndikimin e drejtpërdrejtë politik, ka ushtruar ndaj familjarëve të kandidates për deputete të PD, znj. Silva Hasaj. Këto veprime përfaqësojnë një përshkallëzim të rrezikshëm të përpjekjeve për të frikësuar qytetarët dhe për të deformuar vullnetin e lirë të tyre përmes shantazhit dhe dhunës institucionale.
Kjo është një shfaqje e qartë e kapjes së shtetit, ku organet e rendit, në vend që të jenë në shërbim të ligjit dhe qytetarëve, përdoren si instrumente të pushtetit për të goditur kundërshtarët politikë. Tentativa për të shkrirë bashkë Policinë e Shtetit, politikën dhe krimin e organizuar, është një rrezik serioz për demokracinë dhe stabilitetin e vendit.
Ky akt i përsëritur i përfshirjes së Policisë së Shtetit në këtë fushatë zgjedhore në qarkun Fier, garantoj se nuk do të mbeten pa pasoja. Edi Rama dhe Belinda Balluku, që i urdhërojnë dhe ata që i zbatojnë do të përballen me drejtësinë. Askush nuk është mbi ligjin dhe asnjë përpjekje për të frikësuar opozitën nuk do të ketë sukses.
I bëjmë thirrje OSBE/ODIHR dhe çdo institucioni ndërkombëtar të monitorojë nga afër sjelljen e Policisë së Shtetit në zgjedhje dhe çdo përpjekje për të minuar standardet demokratike në një proces zgjedhor.
Discussion about this post