Protesta e familjarëve të 8-vjeçarit, që u vra në mënyrë makabre nga Klodian Çalamani, është zhvendosur në brendësi të qytetit. Pas protestës në burgun e Vlorës, ku tentuan të futen në ambientet e brendshme të godinës, familjarët kanë bllokuar rrugën në Lungomare, duke u ulur në mes të asfaltit.
Me pankarta në duar me foton e Mateos së ndjerë, familjarët kërkojnë drejtësi, teksa janë mbështetur dhe nga dhjetra qytetarë të Vlorës.
Gjatë kohës që familjarët dhe të afërmit e Mateos po protestonin paqësisht në rrugët e Vlorës, qytetarët që kanë hasur gjatë rrugës, janë ngritur në këmbë dhe kanë duartrokitur kurajon e tyre për të kërkuar drejtësi në këto momente të vështira.
Prej ditësh në qytete të ndryshme janë zhvilluar protesta ndaj fundit tragjike të vogëlushit Mateo, ku qytetarët të revoltuar kërkojnë dënim maksimal për autorin e krimit, teksa shprehen të shqetësuar për sigurinë e tyre.
Discussion about this post