Ilirjana Olldashi është gjyqtarja që do të shqyrtojë ankimimet e bëra nga familjaret e kryebashkiakut Erion Veliaj, Ajola Xoxa e Arbër Veliaj, kundër kontrolleve nga SPAK.
Pas kontrolleve në shtëpinë e të vëllait dhe sekuestrimit të telefonit të bashkëshortes, me anë të avokatëve të tij, Veliaj depozitoi një kërkesë në gjykatë, ku përmes saj kundërshtohen veprimet e SPAK-ut.
Sipas hetimeve të prokurorisë, ekzistojnë të dhëna konkrete që anëtarë të ngushtë të familjes si dhe familjarë të tjerë të afërt me Kryetarin e Bashkisë Tiranë kanë marrë përfitime të paligjshme përmes disa shoqërive dhe individëve, të cilët kanë interesa të drejtpërdrejta në Bashkinë Tiranë. Nga hetimet e kryera deri në këtë fazë, sipas SPAK, kanë rezultuar fakte mbi lidhje të ngushta mes këtyre individëve dhe aktiviteteve të lidhura me qeverisjen lokale, të cilat dyshohet të jenë materializuar në përfitimin e pasurive ose përfitimeve financiare në mënyrë të paligjshme.
Gjithashtu, vlerëson prokuroria, nga hetimet janë evidentuar veprime konkrete të cilat përfshijnë transaksione financiare, kontrata të dyshimta dhe fatura të dyshuara fiktive të realizuara përmes disa shoqërive, të cilat janë në pronësi të regjistruar ose që kontrollohen faktikisht nga familjarët e ngushtë dhe familjarë të tjerë të Kryetarit të Bashkisë.
“Këto transaksione, të cilat dyshohet të kenë mundësuar më pas përfitime të parregullta për familjarë të ngushtë dhe të tjerë familjarë të afërt me Kryetarin e Bashkisë, konstatohet të jenë realizuar përmes një strukture komplekse të marrëdhenieve financiare që qëllim final ka patur integrimin (injektimin) e vlerave monetare në sistemin bankar, duke fshehur në këtë mënyrë origjinën e tyre të paligjshme”, thotë SPAK.
Lexo edhe:
Discussion about this post