Nga Gijotina.com
Dikur faqe zyrtare shtetërore për qytetarët, sot postera dixhitalë të Partisë Socialiste. Po flasim për Ministrinë e Infrastrukturës dhe Energjisë, që në vend të informojë publikun për punët, projektet apo shërbimet… ka zgjedhur të ngjisë foto e flamuj rozë si të ishte Instagrami personal i Belindës.
Belinda Balluku, zonja e pashmangshme në çdo fushatë, nuk ka më nevojë për zyrë shtypi – ajo ka marrë faqet e shtetit dhe i ka kthyer në pankarta dixhitale të fushatës!
Portale shtetërore? Jo, faqe fansash për “Belindën e punëve të mëdha”
Hap faqen e Ministrisë së Infrastrukturës? Nuk gjen informacion për ndërtimin e ndonjë rruge. Gjen Belindën. Në një takim. Në një dalje. Në një veshje të re. Me një slogan rilindas të ricikluar.
E kupton pra qytetari se kush e ka paguar faqen me taksat e tij? Vetëm për t’i thënë: Shiko sa bukur punojmë për partinë!
Asnjë diferencë mes një institucioni dhe një page Facebook-u të PS-së. Vetëm logoja mungon.
Kur shteti bëhet billbordi i partisë
E pabesueshme, por e vërtetë. Në një vend ku të moshuarit mezi presin për ilaçet, ku shkollat shemben me një erë të fortë, dhe ku çmimet janë në ajër – pushteti shpenzon kohë dhe energji për të ngjitur postera dixhitalë. Dhe jo për ndonjë investim madhor, por për t’i bërë like vetes.
Shteti nuk është më institucion – është mjete propagande. Dhe kjo nuk është thjesht arrogancë. Është fyerje. Për çdo qytetar që ka pritur muaj të tërë për një dokument, për një leje ndërtimi, për një dëmshpërblim. Ata s’kanë marrë përgjigje, por kanë parë Belindën – nga të gjitha këndet.
Si është e mundur që askush nuk përgjigjet?
Sepse në Shqipëri, ligji është me pushime në fushatë. Dhe zyrtarët tanë, që betohen për shërbim publik, e shkelin uniformën për një status më shumë, një votë më tepër. Sepse pushteti i tyre nuk matet me rezultat, por me sa herë u shfaqën në ekran.
Dhe qytetari? Hesht, vështron, dhe s’e kupton më nëse po informohet nga shteti apo po mashtrohet nga partia.
Faqet e shtetit nuk janë fletëpalosje elektorale
Në çdo demokraci serioze, kjo do të ishte skandal. Në Shqipëri, kjo është “praktikë”. E gjitha e paguar nga ne. Nga taksat tona. Dhe në vend që të marrim transparencë, na serviret propagandë.
Zonja Balluku ka një detyrë: të menaxhojë infrastrukturën, jo fushatën. Po ajo duket se e ka ngatërruar Ministrinë me “shtëpinë e rozës”.
Një pyetje e thjeshtë për zonjën ministre: në cilën faqe do publikoni fjalën “llogari”? Sepse për gjithë këtë që po bëni, dikur duhet dhënë. Dhe jo përballë kamerave, por përballë ligjit.
Discussion about this post