Zhdukja e Ervis Martinajt vijon të mbetet mister, edhe pse në momentin kur u emërua në postin e ministrit të Brendshëm, Taulant Balla, ashtu si paraardhësi i tij Bledi Çuçi, u zotuan se Policia e Shtetit do t’i jepte një përgjigje shteruese çështjes në fjalë. I konsideruar si mbreti i lojrave të fatit, Martinaj rezulton i zhdukur nga 9 gushti i 2022 dhe që nga ky moment në media janë artikuluar disa pista.
Pak ditë më parë, ministri i Brendshëm, pohoi se polumbarët e RENEA për të paktën dy muaj kanë kryer kontrolle në det për gjetjen e trupit, por pa rezultat.
Ndërkohë në studion e “Shqipëria Live” avokati Redi Ramaj tha se Policia e Shtetit nuk ka dhënë asnjë piste hetimi.
Madje, sipas tij, policia nuk është gati të organizojë një luftë të mirëfilltë ndaj këtyre individëve të shpallur kërkim.
“U tha shumë herë nga autoritetet se i kanë dhënë afat Policisë së Shtetit për ta gjetur ose për ta mbyllur këtë si histori nëse është gjallë apo ka vdekur dhe akoma e sot që flasim nuk e dimë dhe Policia e Shtetit nuk po jep asnjë përgjigje.
Pra minimalisht nuk thotë asnjë pistë hetimi apo ndonjë variant se ku mund të orientohen apo drejtohen dhe vetë policia, por duhet hetimi i gazetarëve për të gjetur disa individë dhe normalisht siç e thashë, duke qenë se çalojnë nga vetë institucionet dhe Policia e Shtetit, mendoj se në këtë fazë që është nuk mund të kryejë apo organizojë një luftë të mirëfilltë ndaj këtyre individëve, prandaj kemi numrin më të lartë të të kërkuarve dhe kemi diskutime të herëpashershme të personazheve të cilët humbin dhe nuk gjenden.
Gjithmonë pasi humbin dhe shpallen në kërkim nga Shqipëria, kuptojmë që kanë kaluar kufijtë me makina, me mjete normale apo me avion, ikin në një vend tjetër dhe aty fitojnë azil”, tha ai.
Discussion about this post