Fati nuk ndihmon gjithmonë më të mirin, dhe kjo shprehje ishte mëse e vërtetë, në rastin e Vllaznisë, e cila u mposht nga islandezet e valur me shifrat 2-1, në sfidën e vlefshme për raundin e dytë të fazës kualifikuese të Women’s Champions League.
Kuqeblutë, vinin në këtë duel, të zhvilluar në “Loro Boriçi”, me objektivin e qartë, për të kaluar në raundin play-off të kompeticionit elitar europian për femra.
Të parët që kaluan në avantazh ishin islandezet në minutën e 23-të. Pjesa e parë u mbyll me avantazhin e miqve. Në pjesën e dytë, Vllaznia i shkoi më pranë golit, duke sulmuar pa pushim portën e skuadrës kundërshtare, por fati nuk ishte me vendaset, të cilat në disa raste u ndalen edhe nga traversa.
Në momentin më të mirë të kampioneve të Shqipërisë, ekzaktësisht në minutën e 81’, Valur dyfishoi shifrat, në goditjen e tretë drejt portës.
Teksa dukej që sfida do të mbyllej kështu, Vllaznia la gjurmën e saj. Në minutën e parë shtesë të pjesës së dytë, Megi Doçi realizoi një supergol nga jashtë zone. Por ky gol nuk mjaftoi që Vllaznia e femrave të përsëriste historinë dhe kështu eliminohet.
Duhet thënë se dhe arbitrimi la për të dëshiruar, me gjyqtaren austriake, që e kishte mendjen të ndëshkonte vetëm faullet e Vllaznisë, duke toleruar pothuajse 100%, skuadrën e Valur. Ndoshta UEFA duhet t’i përgatisë më mirë gjyqtaret (nuk duam të dukemi seksistë por edhe këto gafa nuk e ndihmojnë organizmin më të lartë të futbollit europian).
Fokusi i shkodraneve do të jetë tashmë te mbrojtja e titullit kampion në futbollin e femrave, në Shqipëri.
Discussion about this post