Gjatë fjalës së tij sot në Kuvend, deputeti Fatmir Xhafaj ka thënë se institucionet e drejtësisë kanë shumë boshllëqe. Sipas tij, që të luftohet korrupsioni dhe rritet konkurrenca në treg, institucionet audituese dhe kontrolluese duhet të jenë në formën e tyre më të mirë.
Xhafaj tha se është i patolerueshëm fakti që SPAK dhe BKH nuk kanë ende zyra, kur ne presim punë të madhe nga këto institucione. Sakaq, ai tërhoqi vëmendje edhe për shkollën e magjistraturës, duke thënë se duhet të mirëtrajnohen studentë të rinj.
“Kërkohen ndryshime të forta në procesin e prokurimeve dhe audituese. Ashtu sikundër me shumë të drejtë kërkohet ngritja dhe profesionalizimi i strukturave që auditojnë. Çdo masë do të rriste ndjeshëm konkurrencën në treg. Do të forconte transparencën. Është lajm i mirë rritja e buxhetit për SPAK ku është edhe BKH-ja. Kjo është diçka për tu përshëndetur por është e papranueshme se kur kanë kaluar kaq kohë nga krijimi i SPAK, ka ende mungesë zyrash.
Pse flitet dhe për mbingarkesë zyrash? Ende nuk ka një përllogaritje të qartë të efekteve që sjell ndryshimi i hartës. Nuk ka asnjë angazhim për mbështetjen e shkollës së magjistraturës në mënyrë që të rritet numri i studentëve të rinj. S’e kuptoj dot se si për 30 OPGJ prokuroria vazhdon odisenë shumëvjeçare të pritjes për marrjen e pagesave për mbingarkesën e punës”, tha Xhafaj. Sipas tij, që të flasin për një reformë në drejtësi që ecën mirë, duhet që edhe institucionet përgjegjëse të jenë në gjendje të mirë.
Discussion about this post