Fatos Kongoli për Kadarenë: Shkrimtar me përmasa botërore, i pavdekshëm

Fatos Kongli e vlerësoi Ismail Kadarenë si “një shkrimtar i pavdekshëm”.

“Është një mik. Si autor është histori e gjatë, e kam adhuruar gjithmonë edhe kur s’më shkonte mendja se do shkruaja dhe vetë. Është një shkrimtar i madh me përmasa botërore. Njeriu që ka bërë për Shqipërinë, nuk e di kush e krahasonte sot në televizion me Skënderbeun”, tha Kongoli në një prononcim për gazetarët jashtë ambienteve të TKOB, ku po mbahen homazhet për Kadarenë, i cili u nda nga jeta mëngjesin e së hënës.

Më tej, shkrimtari ai u shpreh se Kadare “është një shkollë letrare, një fenomene letrar”.

“Shumë shkrimtar të rinj e imitonin, mirëpo proza e Kadaresë është e paimitueshme. Është një shkrimtar i pavdekshëm”, tha Kongoli.

I pyetur “si e mbani mend takimin e fundit”, Kongoli u shpreh: Vitet e fundit u miqësuam shumë me njëri-tjetrin. Kemi pasur një mik të përbashkët. Dhe vila e Kadaresë në Qerret ishte ngjitur me mikun tonë dhe takoheshim shpesh. Më ndodhte të takohesha edhe me raste të ndryshme festash dhe muhabetet tona kanë qenë nga më të bukurat, sepse Ismaili ishte i çliruar komplet nga gjithçka dhe fliste lirshëm.