Kampionati Europian i Peshëngritjes që po zhvillohet në Batumi të Gjeorgjisë, në vend që të ishte një skenë e festimit të vlerave sportive, është shndërruar në arenën e një padrejtësie flagrante që godet në zemër sakrificën e sportistëve tanë elitarë.
Ndërkohë që Briken Calja shkëlqeu duke u shpallur kampion Europe në stilin e shtytjes dhe nënkampion në dygarësh, festa e kuqezinjve u zbeh nga një vendim skandaloz i gjyqtarisë, që i mohoi Erkand Qerimajt rezultatin e merituar pas një karriere të tërë sakrificash.
Shkodrani, një nga peshëngritësit më të mirë në historinë e Shqipërisë, u përball me një qëndrim dashakeq nga tryeza e jurisë. Qerimajt i u anuluan të tria provat në stilin e shtytjes, por momenti që revoltoi mbarë opinionin sportiv ishte prova e dytë me 184 kg. Pasi e ngriti peshën me sukses, gjyqtarët pretenduan për një “faull” të paqenë, duke fshirë me një të rënë të lapsit një përpjekje titanike. Vetë Qerimaj ka reaguar ashpër në rrjetet sociale, duke e cilësuar këtë vendim si një “turp” dhe duke e shoqëruar reagimin me pamjet filmike që vërtetojnë rregullsinë e provës.
Është vërtet e dhimbshme të shohësh se si organizatorët dhe gjyqtaria në Batumi trajtojnë dy ikona si Calja dhe Qerimaj. Brikeni, 36 vjeç dhe Erkandi, 37 vjeç, po bëjnë sakrificën e fundit në prag të tërheqjes nga sporti. Në këtë moshë, çdo kilogram i ngritur peshon sa një jetë e tërë stërvitjeje, dhimbjesh dhe privimesh. Nëse ajo provë e Erkandit do të quhej e rregullt, siç ishte në të vërtetë, ai do të renditej në vendin e tretë në stilin e shtytjes, duke marrë medaljen e bronztë, dhe në vendin e pestë në dygarësh.
Në vend të këtij rezultati dinjitoz, kampionati i mbyll dyert një kampioni si Qerimaj pa një rezultat në dygarësh, vetëm prej paaftësisë ose tendencës së një gjyqtarie që nuk respekton as djersën dhe as historinë. Ky nuk është thjesht një vendim teknik, është një skandal. Erkand Qerimaj nuk kishte nevojë për lëshime, por për drejtësi; atë që ia vodhën në Batumi, por që nuk mund t’ia vjedhin kurrë në sytë e shqiptarëve, për të cilët ai mbetet një kampion i pathyeshëm, krah për krah me Briken Caljan.
gijotina.com/
Discussion about this post