Katër punonjës të Bashkisë Korçë u pezulluan nga detyra dhe ndaj tyre u caktua masa e sigurimit personal “Detyrim për t’u paraqitur në policinë gjyqësore” nga gjykata, me kërkesë të prokurorisë së rrethit.
Sipas akuzës, zyrtarët e pezulluar nga detyra dyshohet se kanë favorizuar në mënyrë të paligjshme me qëllime përfitimi individual subjekte apo persona të veçantë duke llogaritur në mënyrë të paligjshme taksën e infrastrukturës për ndërtimet e reja dhe komplekset luksoze në lagjet 1, 2, 3, 11 dhe 12 të qytetit.
Duke vepruar në kundërshtim me ligjin, personat nën hetim akuzohen se kanë shpërdoruar detyrën dhe kanë dëmtuar rëndë interesat e shtetit.
Për rrjedhojë, dje, më 9 prill, u ekzekutua nga policia vendimi për caktimin e masave të sigurisë “Detyrim Paraqitje” dhe Pezullimi i ushtrimit të një detyre a funksioni publik” ndaj zyrtarëve:
1. Zhaneta Lubonja, lindur dhe banues në Korçë, me detyrë Drejtore e Drejtorisë së Planifikimit dhe Kontrollit të Zhvillimit të Territorit, Bashkia Korçë, e dyshuar për kryerjen e veprës penale “Shpërdorimi i detyrës”.
2. Ermal Gjermani, lindur dhe banues në Korçë, me detyrë e Përgjegjës i Sektorit pranë Drejtorisë së Planifikimit dhe Kontrollit të Zhvillimit të Territorit, Bashkia Korçë, i dyshuar për kryerjen e veprës penale “Shpërdorimi i detyrës”.
3. Olvas Petro, lindur dhe banues në Korçë, me detyrë specialist i Buxhetit, si dhe në cilësinë e specialistit të përllogaritjes së taksës së ndikimit të infrastrukturës, Bashkia Korçë, i dyshuar per kryerjen e veprës penale “Shpërdorimi i detyrës”.
4. Soniel Prifti, lindur dhe banues në Korçë, me detyrë Drejtor i Drejtorisë së Taksave dhe Tarifave Vendore, Bashkia Korçë, i dyshuar për kryerjen e veprës penale “Moskallëzimi i krimit”.
Lexo edhe:
Falja e taksave për ndërtuesit, zyrtarët e Bashkisë Korçë dëm shtetit mbi 30 mln lekë
Discussion about this post