Numri i krimeve të urrejtjes në Shtetet e Bashkuara u rrit në mënyrë dramatike gjatë vitit 2021, duke shënuar një rekord të ri prej 11 mijë incidentesh, thuhet në një publikim shtesë të FBI-së që plotëson raportin e saj të përvitshëm për krimet e urrejtjes, njofton Zëri i Amerikës.
Në këtë material përditësues thuhet se pati 10,840 incidente krimesh urrejtjeje të raportuara për vitin 2021, një rritje kjo prej 31% nga 8,263 të raportuara në vitin pararendës. FBI-ja kishte raportuar fillimisht 7,262 krime të tilla, bazuar në të dhëna jo të plota.
Rritja në një vit e krimeve të urrejtjes është më e larta në mbi tre dekada, thotë Brian Levin, drejtor i Qendrës për Studimin e Urrejtjes dhe Ekstremizmit në Universitetin Shtetëror të Kalifornisë, San Bernardino.
“Kjo përfaqëson epokën e re tmerruese në të cilën gjendemi, me nivele të rritura historike pas shumë vitesh, dhe një rekord tashmë të ri të vitit 2021”, i tha Zërit të Amerikës zoti Levin gjatë një interviste.
Krimet e urrejtjes ndaj afrikano-amerikanëve u rritën me 14%, në 3,277 incidente. Incidentet e bazuara tek paragjykimi kundër aziatikëve u rritën me 167%, në 746, ndërsa incidentet kundër të bardhëve u rritën me 27%, në shifrën 1,107.
FBI-ja publikoi raportin e saj për krimet e urrejtjes në dhjetor, me 7,262 incidente për vitin 2021. Por, raporti mbështetej në të dhëna jo të plota, pasi rreth 4 mijë agjenci të zbatimit të ligjit nuk kishin arritur të fillonin përdorimin e një sistemi të ri të FBI-së për mbledhjen e të dhënave.
Për të ofruar një pamje më të saktë të krimeve të urrejtjes gjatë vitit 2021, FBI-ja në vazhdim pranoi të dhënat e mbledhura sipas sistemit të vjetër nga rreth 3 mijë agjenci, tha një zyrtar i lartë i FBI-së.
Discussion about this post