Në qytetin e Elbasanit ka nisur marshimi i fëmijëve nga katër qytete, në lidhje me ndotjen e mjedisit. Sipas të dhënave, janë ,mbledhur sot në protestë nxënës të shkollave të Elbasanit, Durrësit, Peshkopisë dhe Burrelit. Ata janë bërë bashkë për një kauzë shumë të rëndësishme, kundër ndotjes së mjedisit, ndërsa shprehen se qytetet e tyre janë lënë pas dore dhe ajri i ndotur po iu merr jetën.
Nuk ka të bëjë vetëm me mbrojtën e mjedisit nga mbetjet industriale por edhe nga mungesa e infrastrukturës në shkolla, që ka çuar në ngrohjen me dru. Fëmijët u kanë bërë thirrje qytetarëve por edhe qeveritarëve për të mbrojtur mjedisin. Ata kërkojnë sensibilizimin e të gjithëve për këtë çështje shumë delikate.
“Rritjen e ndërgjegjësimit për mbrojtjen e mjedisit, bashkitë të përmirësojnë infrastrukturën në shkolla, tema e mjedisit të trajtohet me vëmendje, të hartohen plane mjedisore, të monitorohet cilësia e ajrit dhe të kontrollohet pluhuri i shkaktuar nga ndërtimet, mjedisi ka rëndësi, të bashkohemi të gjithë.
Ndaj kemi nisur me këtë marshim të parë, të jetë një ogur i mbarë nga rinia për rininë, duam ndërgjegjësimin e qytetarëve dhe politikbërësve. Jemi nxënës që vijmë nga shkolla të ndryshme, nga zona që ndikohen, janë edhe fëmijë që vijnë nga zona industriale”, u shpreh një prej tyre. Ata shprehen se shumë e njerëz e shohin si shqetësim të vogël ndotjen e ajrit, por në fakt kjo problematik po sëmurë shumë fëmijë dhe po iu merr jetën shumë të tjerëve.
Discussion about this post