Siç edhe ishte paralajmëruar, pas përplasjes së ashpër me policisë, fermerët e Lushnjës kanë dalë sërish në protestë.Sindikata e Fermerëve të Bashkuar është shprehur se qëllimi i tubimit është të sensibilizojë qeverinë për ndryshimin e paketës fiskale në lidhje me bujqësinë. Kjo protestë e tyre vjen pas ndryshimeve fiskale nga qeveria, që parashikonin heqjen e subvencionit me 6% të TVSH-së. Ndërkohë, ata nisën disa kërkesa pak ditë më parë në adresë të Ministrisë së Bujqësisë dhe kryeministrit Rama, ku kërkonin subvencione direkte për prodhimet bujqësore.
Fermerët, kërkojnë nga qeveria plotësimin e kërkesave të tyre ekonomike, duke filluar nga subvencionimi për njësi prodhimi, lehtësimi e burokracirave, nxitja e eksporteve, dhe barazimi i shkallës së TVSH-së në shitje me atë në blerje. Fermerët shtojnë se kanë marrë kredi për investimet që kanë bërë, ndaj stimulimi i qeverisë për të tregtuar produktet e tyre është domosdoshmëri. E gjithë protesta është mbikëqyrur nga forca të shumta policie të komisariatit Lushnje si dhe forcat shqiponja dhe FNSH të ardhura nga drejtoria e policisë qarkut Fier.
Lidhur me këtë protestë ka reaguar dhe presidenti Ilir Meta, i cili ka thënë se kjo protestë po përcjell vëmendje, teksa ka theksuar që qeveria duhet të dialogojë me fermerët për të vlerësuar propozimet që ato kanë bërë.
“Me shumë vëmendje po përcjell protestat e fermerëve të Myzeqesë dhe trevave përreth.
I njohur me kërkesat e tyre për përmirësimin e paketës fiskale në lidhje me bujqësinë, theksoj rëndësinë e vendosjes sa më parë të dialogut, për vlerësimin nga ana e Qeverisë të propozimeve, që ata kanë bërë.”
Sipas presidentit mbështetja e sektorit që fermerët përfaqësojnë është jetik për ekonominë e vendit.
“Mbështetja e sektorit të bujqësisë, jetik për ekonominë e vendit, si dhe dëgjimi i zërit të fermerëve është i domosdoshëm.”, shkruan Meta.
Paralelisht në Kuvend, kryeministri Edi Rama teksa fliste për projektbuxhetin e vitit 2022, përmendi edhe sektorin e bujqësisë bëri me dije se 7.1 miliardë lekë janë vendosur në dispozicion të buxhetit të shtetit si mbështetje, teksa pohoi se ka një rritje të konsiderueshme në fushën e eksporteve në Bujqësi, kryeministri theksoi gjithashtu se krahasimisht me vitin 2013 sasia e tokës së punuar në Shqipëri është 2 herë më e madhe.
Discussion about this post