Seanca maratonë për buxhetin e vitit 2022 është shoqëruar me shumë diskutimeve mes opozitës dhe qeverisë lidhur me miratimin e një sërë propozimesh që kundërshtonin njëra-tjetrën. Kundërshtimet ndaj mazhorancës nuk kanë ardhur vetëm nga opozita, por edhe nga rradhët brenda Partisë Socialiste. Ish-kryeministri Erion Braçe, i cili propozoi paketën e tij për buxhetin e 2022-isht, u shpreh se mos aprovimi i propozimeve të tij solli dhe miratimi i buxhetit të propozuar nga qeveria është një personalizim i paketës fiskale, që e kthen në buxhetin në një ligj klientelist dhe sipas tij kjo është gjëja me e keqe që mund t’i ndodh tregut dhe ekonomisë. Sipas amendamenteve të propozuara nga ai, Braçe theksoi se parashikon më shumë mbështetje për bujqësinë dhe fermerët përmes heqjes së tatimit 10% për inputet bujqësore si dhe rivendosjen e skemës 20% të kompensimit të TVSH-së për fermerët. Gjithashtu, përmirësim duhet të pësojë edhe ligji për tatimin mbi të ardhurat dhe llogaritja e pagave të bëhet mbi pagën 40 mijë lekë dhe jo mbi të ardhurat 30 mijë lekë që propozon qeveria me paketën e re fiskale.
Amendamentet e Erion Braçes:
-Barazim i TVSH-së 20% në bujqësi
– Taksimi i birrës dhe i pijeve alkoolike
– 0% TVSH për inputet bujqësore
– Taksim i qumështit pluhur për të gjithë importuesit
– Taksim i Vajit të palmës 150 lekë /kg
– Heqja e favorizimit të TVSH-së për hotelet me 5 yje
– Heqja e favorizimit të TVSH-së për brande ndërkombëtare
– TVSH për furnizimin me tokë për ndërtimet në zonat rezidenciale dhe bregdet
Amendamentet e tij të dorëzuara me disa ndryshime në paketën fiskale morën vetëm 8 vota pro e ndërsa mazhoranca ka pranuar vetëm mendimin e Taulant Ballës për shtimin e fondit prej 60 milionë lekësh për KPA-në. Braçe tha se me këtë paketë të prezantuar nga qeveria është goditur më i dobëti duke kërkuar të hiqet favorizimi TSVH-së për hotelet me 5 yje, pasi sipas tij mjafton favori që iu është bërë me lejimin e kazinove.
Por, Erion Braçe duket se nuk është i vetmi në rradhët e Partisë Socialiste që kundërshton hapur buxhetin e propozuar, e tashmë të miratuar nga qeveria. Ish-zv.ministrja e Financave dhe Ekonomisë, Irena Beqiraj ka publikuar një skemë, që sipas tij do të duhej të ishte miratuar nga Kuvendi ditën e djeshme. Në skemën e saj, vërehet taksimi me 0 TVSH për lëndën e parë bujqësore dhe makineritë bujqësore ndaj fermave e vogla, si një stimul ekonomik i qeverisë për fermerët. Që zinxhiri i progresit ekonomik të vijojë, Beqiraj thotë se skema e autofaturimit me TVSH për blerësit nga fermat e vogla duhet hequr. Ndërkohë lidhur me fermat e mëdha, një pjesë e taksave që ato paguajnë iu duhet kthyer sërish nga shteti në formën e subvencioneve, në bazë të TVSH-së së faturuar. Sipas Beqirajt, buxheti i miratuar nga qeveria ditën e djeëshme, po favorizon vetëm një segment të caktuar ekonomik, ndaj taksimi i fermerëve, sipas saj është një akreobaci që qeveria do të detyrohet t’a kthejë shumë shpejt.
Propozimi i plotë nga ish-zv.ministrja e Financave dhe Ekonomisë, Irena Beqiraj:
Si duhet të ishte skema e TVSH-së për fermerët!
Taksimi i fermerëve ka qenë produkt par excellence i lobingjeve edhe i politikës.
Nje skemë e drejtë edhe incentivuese pa dëmtuar fermat e vogla por që ndihmon bashkimin dhe krijimin e fermave të mëdha do të duhet te përmbante :
1. Tvsh 0 në lëndën e parë bujqësore
2. Tvsh 0 në makineritë bujqësore
3. Heqjen e skemës te autofaturimit me TVSH qoftë të plotë qoftë të reduktuar për grumbulluesit kur blejnë nga fermat e vogla (pasi dy kushtet e para e kanë lehtësuar fermën e vogël nga TVSH-ja në blerje)
4. Aplikimin e TVSH-së për produket e fermave të mëdha.
5. Kthimi i një pjese të TVSH-së faturuar nga fermat e mëdha, në forma subvencioni në bazë të TVSH-së së faturuar, (kjo do ta incentivonte fermën të bashkohej, por edhe të faturonte me TVSH).
Eksperienca tregoi që cdo variant tjetër krijon përfitime të padrejta të një segmenti të caktuar, nuk e ndihmon fermerin pavarësisht si paketohet edhe ndikon në fragmentizimin e mëtejshëm të buqësisë edhe jo në krijimin e ekonomisë së shkallës .
Kjo që ka ndodhur me paketen fiskale 2022 me taksimin e fermerëve është sërisht një akrobaci qe do të detyrohen t’a kthejnë shumë shpejt!, shkruan ish-zv.minstrja e Ekonomisë dhe Financave.
Nga ana tjetër Partia Demokratike prezantoi amandamentet e saj lidhur me buxhetin e vitit të ardhshëm, por nuk mori votat e nevojshme. Grupi i Partisë Demokratike prezantoi një amendament për uljen e TVSH-së për produktet e shportës ushqimore nga 20% në 6%, si një mjet për të nxitur konsumin, me argumentin se një pjesë e produkteve ushqimore në tregjet me pakicë kanë pasur një rritje prej pothuajse 30% të çmimeve.
Sipas PD-së paketa fiskale e sjellë nga qeveria, sjell një rritje të taksave për qytetarët me 50 milionë euro, si dhe rrit barrën mbi fermerët.
Edhe propozimet e tjera të mbërritura nga rradhët e Lëvizjes Socialiste për Integrim, konkretisht nga Monika Kryemadhi dhe Erisa Xhixho, Petrit Vasili u rrëzuan nga qeveria.
Me votat e mazhorancës u miratuan 4 projektligje që preknin drejtpërdrejtë bujqësinë, ku u hoq rimbursimi për fermerët dhe u vendos taksë 10% për inputet. Gjithashtu, u ndryshua taksimi progresiv mbi pagat, të cilat deri në 40 mijë lekë nuk do të paguajnë tatim, pagat nga 50-200 mijë lekë do paguajnë 13% dhe pagat mbi 200 mijë lekë do të paguajnë 23%. I treti i miratuar është projektligji për akcizat, ku u vendos rritje e akcizës për cigaret, apo vendosja e taksës 6 lekë për çdo litër gaz nga korriku i 2022. Projektligji i fundit i miratuar ishte për taksat kombëtare ku do vendoset taksë 40 lekë për litër për karburantin me të cilin furnizohen jahtet, si dhe taksë për qumështin pluhur dhe nën produktet e tij për të gjitha kompanitë që nuk e reflektojnë në etiketën e prodhimeve të tyre, teksa e importojnë dhe nuk e reflektojnë në etiketat e produkteve që prodhojnë.
Discussion about this post