Kalimi i argjentinasit Enzo Fernandez nga Benfica te Chelsea për 120 milionë euro në momentet e fundit të merkatos së dimrit “rrëmbeu” gjithashtu dhe vendin e parë, si transferimi më i shtrenjtë në historinë e Premier League.
Ditën e sotme, kampioni i botës, me fanellën “albiceleste” ka folur për herë të parë si lojtar i “bluve”, ku siguroi tifozët që do të japë maksimumin e tij në fushën e lojës për të sjellë trofe në “Stamford Bridge”.
“Jam shumë i lumtur me mundësinë që më ka dhënë Chelsea dhe do të bëj gjithçka për të arritur objektivat e klubit.
Si lojtar dhe person, mund të ofroj energji të mirë dhe do të jap gjithçka, si dhe do t’i mbështes shokët e skuadrës për t’i bërë ata edhe më të mirë.
Chelsea është një klub i madh, një klub që është gjithmonë në garë për trofe dhe së fundmi ka fituar Ligën e Kampionëve. Ne do të përpiqemi të arrijmë gjithçka që dëshiron klubi dhe ta çojmë atë në nivelin tjetër.
Unë nuk kam luajtur ende me ndonjë nga shokët e mi të ri të skuadrës dhe nuk kam pasur ende mundësinë të bashkëveproj me ndonjërin prej tyre, por e di se cilët janë dhe mezi pres të punoj me të gjithë ata!”,- është shprehur Fernandez në fjalën e tij të parë si “londinez”.
Discussion about this post