Muxhahedinët që janë të vendosur në kampin e MEK në Manzë festojnë më 1 korrik një festë të tyre, ndërkohë që forca policore vijojnë të kontrollojnë automjetet dhe personat që hyjnë dhe dalin nga kampi.
Nga raportimet mësohet se policia ka bllokuar një foni dhe një skenë lëvizëze, e cila do t’i shërbente banorëve të kampit për të realizuar festimet.
Mësohet se Policia ka kërkuar nga drejtuesit e kampit që të shmangin grumbullimet apo manifestime, sikundër ishte paralajmëruar.
Sërisht mëngjesin e sotëm, forca policore nga Drejtoria e Durrësit, mbështetur edhe nga efektivë të FNSH kanë ngritur pika kontrolli jashtë kampit të MEK, ndërsa përveç makinave që hyjnë e dalin, janë kontrolluar edhe personat.
Sipas raportimeve, vendosja e pikës së kontrollit është bërë për të eliminuar rreziqe të mundshme ndaj kampit, por po ashtu dhe për të mos lejuar aktivitete që shkelin ligjin apo futja në të të personave të pakërkuar.
Ndërhyrja e parë e Policisë së Shtetit në kampin e MEK ndodhi në 20 qershor, atje ku u regjistruan edhe përleshje dhe kundërshtime të forta. Policia në këtë kontroll arriti të sekuestrojë servera dhe kompjutera në kuadër të një hetimi që SPAK po kryen, ndërsa janë regjistruar procedime penale ndaj drejtuesve të kampit.
Discussion about this post