Drejtori i Rendit Publik, Ylli Vasili, ka dalë sot në një konferencë për mediat nga ku ka raportuar rregullat që duhet të kenë parasysh qytetarët dhe bizneset në lidhje me organizmin dhe grumbullimet e festave e fundvitit. Vasili ka thënë se do të shtohen kontrollet nga policia në mënyrë që të mos krijohen trazira dhe incidente nga organizimet e ndryshme.
“Kontrolle në pikat doganore, tregje e njësi tregtare, për parandalimin e futjes dhe hedhjes në treg të lëndëve piroteknike dhe fishekzjarrëve, që rrezikojnë sigurinë publike, jetën dhe shëndetin e qytetarëve. Masat e shtuara konsistojnë në rritjen e kontrollit të territorit, për të verifikuar zbatimin e kritereve të prodhimit, magazinimit e përdorimit të lëndëve piroteknike e fishekzjarrëve, në prag të festës së Krishtlindjeve dhe Vitit të Ri”, u shpreh ai.
Ndër të tjera ai tha se do ndalohet në mënyrë drastike shtija e fishekëzjarreve, ndërsa kërkoi që edhe prindërit të jenë të kujdesshëm dhe të mos iu blejnë fëmijëve materiale të tilla dhe t’i mbajnë nën mbikëqyrje. “Policia e Shtetit apelon për të gjitha subjektet tregtare që të mos tentojnë të fusin dhe të tregtojnë lëndë piroteknike e fishekzjarrë në mënyrë të kundërligjshme, pasi do të përballen me ligjin. Njëkohësisht kërkon mirëkuptimin dhe bashkëpunimin e prindërve që të mos i lejojnë fëmijët të blejnë dhe të përdorin fishekzjarrë, pasi rrezikojnë jetën e shëndetin e tyre dhe shkaktojnë prishje të qetësisë publike”, tha ai. Ndërsa theksoi se do të vihen para përgjegjësisë, madje do të aplikohen edhe gjoba ndaj atyre që tregtojnë fishekëzjarre.
Discussion about this post