Tërbuni ia del të fitojë finalen e “play-out” ndaj Flamurtarit dhe sezonin e ardhshëm do të garojë sërish në Kategorinë e Parë. 90 minutat e duelit të luajtur në “Elbasan Arena” u mbyllën në barazim 0-0.
As 30 minutat shtesë nuk prodhuan asnjë gol, edhe pse kuqezinjtë nga Vlora ishin më të rrezikshëm dhe Diamanti kishte disa raste për të dërguar topin në rrjetë. Ekipet iu drejtuan penalltive, aty ku u treguan më të saktë pukjanët.
Finalja e “play-out”, Kategoria e Parë
Tërbuni-Flamurtari 0-0 (5-4 me penallti)
Andi Ribaj gaboi penalltinë e fundit, duke e dërguar topin jashtë portës. Përfundimisht 5-4 për Tërbunin që feston me tifozët dhe siguron qëndrimin në të Parën.
Lot dhe zhgënjim te Flamurtari, që nuk ia doli të evitojë turpërimin e madh. Një nga skuadrat më popullore të futbollit shqiptar do të luajë në Kategorinë e Dytë sezonin e ardhshëm.
