Gazetari Blendi Fevziu tregoi detaje nga rrëzimi i sistemit komunist në 1990, ku studentët dolën dhe protestuan kundër rregjimit.
Fevziu shprehet se atë ditë e kujton në çdo detaj dhe se ka ndjerë frikën më të madhe, madje shprehet se i dridheshin këmbët kur kuptoi se studentët u ngritën kundër regjimit.
“Kujtoj cdo detaj të asaj dite. Kur u afrova drejt qyteti studentit pashë vajzat e vitit të parë të fakultetit të gjuhë letërsisë që më thanë është demonstratë. Unë dëgjoja zërat. Në këtë moment unë shtova hapat për t’u afruar tek grupimi dhe para meje u vendos një resht me ushtarë. Ka qenë momenti i parë që unë ndjenja një frikë, frika më evidente, fillova që të më dridheshin gjunjët, se thashë ku jam tani.
Ushtarët bllokuan rrugën. Kur dola tek pjesa ku po vinte turma, pashë në resht të parë djalin më të urtë të kursit tonë, kurrë nuk i ishte dëgjuar zëri. Unë u shokova, i pari ishte ky bashkë me Azem Hajdarin, ishin kapur për krahu. Ishin të vendosur, më pas pashë disa nga miqtë e mi si Ben Blushi dhe u bllokuam tek liceu. Ai ka qenë momenti i fundit i një frike të madhe”, tha ai në një intervistë për Euronews Albania.
Shënohet sot Dita Kombëtare e Rinisë.
Më 8 dhjetor 1990, një grup studentësh e pedagogësh të Universiteteve të Tiranës, u bënë iniciatorë e protagonistë të kthesës së madhe historike, protestave paqësore që sollën rënien e sistemit komunist dhe lindjen e demokracisë.
Me shprehjen “E duam Shqipërinë si gjithë Europa”, të rinjtë kërkuan ngritjen e sistemit të vlerave perëndimore dhe të shtetit të së drejtës; integrimin në Europë dhe garantimin e pluralizmit politik si bazë kryesore për një shoqëri të lirë e demokratike.
Rezistenca e tyre i dha fund epokës të gjatë të vetëizolimit duke i hapur kështu rrugën e ekonomisë së tregut dhe shoqërisë së hapur.
Discussion about this post