FIFA ka zyrtarizuar dënimet për incidentet e rënda që ndodhën pas finales së Kupës së Botës 2026 mes Spanjës dhe Argjentinës.
Përplasjet mes lojtarëve pas përfundimit të ndeshjes, së bashku me incidentet diskriminuese të tifozëve, kanë sjellë sanksione të ashpra nga Komiteti Disiplinor i FIFA-s.
Dënimi për Argjentinën
Federata Argjentinase e Futbollit (AFA) është gjobitur me një total prej 321 mijë dollarësh për shkelje të disa neneve të Kodit Disiplinor të FIFA-s, përfshirë: përdorimin e një ngjarjeje sportive për demonstrime me natyrë josportive;
sjellje të papërshtatshme të ekipit;
diskriminim dhe abuzim racist nga tifozët;
shkelje të rregullave për rendin dhe sigurinë në stadium.
Për shkak të shkeljeve të lidhura me diskriminimin, Argjentina do të luajë dy ndeshjet e ardhshme në shtëpi me vetëm 50% të kapacitetit të stadiumit.
Nga gjoba totale, 100 mijë dollarë duhet të investohen në një plan konkret për luftimin e diskriminimit.
Një pjesë e sanksionit, që përfshin një ndeshje dhe 100 mijë dollarë të gjobës, është pezulluar dhe do të jetë subjekt i një periudhe prove.
Dënime të rënda për lojtarët
FIFA ka dhënë gjithashtu pezullime të konsiderueshme për protagonistët e përplasjes pas finales:
Leandro Paredes – 10 ndeshje pezullim + 90 mijë dollarë gjobë;
Nahuel Molina – 7 ndeshje pezullim + 90 mijë dollarë gjobë;
Thiago Almada – 1 ndeshje pezullim + 30 mijë dollarë gjobë;
Roberto Ayala, pjesëtar i stafit teknik – 3 ndeshje pezullim + 30 mijë dollarë gjobë;
Gavi, lojtar i Spanjës – 1 ndeshje pezullim + 30 mijë dollarë gjobë.
Sipas FIFA-s, pezullimet do të zbatohen në ndeshjet e ardhshme të ekipeve kombëtare përkatëse.
Vendimet u janë komunikuar palëve dhe ato kanë 10 ditë për të kërkuar vendimin e arsyetuar.
Sanksionet mund të apelohen në përputhje me Kodin Disiplinor të FIFA-s.
Finalja Spanjë–Argjentinë, e luajtur më 19 korrik 2026, u shoqërua kështu me pasoja të rënda disiplinore edhe pas përfundimit të saj, ndërsa FIFA ka vendosur të ndëshkojë si sjelljen e lojtarëve dhe stafit, ashtu edhe incidentet diskriminuese të tifozëve.
Discussion about this post