FIFA ka hapur procedurë disiplinore ndaj Federatës së Futbollit të Argjentinës për sjellje të pahijshme dhe shkelje të “ferplejit” në festën pas triumfit në Botëror.
FIFA ka përmendur rregulloren e mediave dhe marketingut për këtë çështje, që lidhet me zhurmën e madhe që kanë bërë lojtarët argjentinas përgjatë zonës ku jepen intervistat pas ndeshjes.
Kjo kishte ndodhur më 18 dhjetor, pas finales së Botërorit ndërmjet Argjentinës dhe Francës.
Argjentina fitoi në penallti, ndërsa koha e rregullt e vazhdimet kishin përfunduar 3:3 në “Lusail Stadium” në Katar.
Rreth tri orë më vonë lojtarët, të udhëhequr nga Lionel Messi, vrapuan dhe kënduan këngë në zonën zyrtare të intervistave dhe kanë dëmtuar muret. Ata nuk u ndalën për të dhënë intervista për mediat televizive e të shkruara.
Akuzat
Akuzat kanë përfshirë edhe thyerjen e rregullave të ferplejit dhe sjelljes së pahijshme, por pa u përmendur emri i Emiliano Martinezit, që kishte bërë gjest të turpshëm pasi e pranoi çmimin si portieri më i mirë i Kupës së Botës.
FIFA ka dënuar Federatën e Futbollit të Meksikës dhe Ekuadorit për aktet diskriminuese të tifozëve të tyre.
Me 10 mijë franga zvicerane, FIFA e dënoi Meksikën për fyerje në dy ndeshje, ndërsa në ndeshjen hapëse të Ekuadorit kundër Katarit ekuadorianët kishin fyer Kilin dhe për këtë federata ekuadoriane është dënuar me 20 mijë franga zvicerane.
Discussion about this post