Presidenti i FIFA-s, Gianni Infantino i ka kërkuar kryeministrit britanik, Boris Johnson disa përjashtime, që klubet e Premier League të lirojnë lojtarët për ndeshjet kualifikuese për Kupën e Botës, që janë nga vendet e ‘listës së kuqe’.
Klubet nga Anglia dhe Spanja kanë thënë se nuk do t’i lejojnë lojtarët e tyrë të udhëtojnë drejt vendeve të ‘listës së kuqe’.
“Unë kam sugjeruar që të zbatohet një qasje e ngjashme me fazat përfundimtare të Euro 2020”, ka thënë Infantino.
Infantino ka thënë se ishte një “çështje me urgjencë dhe rëndësi të madhe”.
“Ne jemi përballur me probleme globale së bashku në të kaluarën dhe duhet të vazhdojmë ta bëjmë edhe në të ardhmen”.
“Unë po bëj thirrje për një solidaritet nga çdo shoqatë anëtare, çdo ligë dhe çdo klub, për të bërë atë që është e drejtë për lojën globale”.
“Shumë nga lojtarët më të mirë në botë konkurrojnë në ligat si në Angli dhe Spanjë, dhe ne besojmë se këto vende ndajnë gjithashtu përgjegjësinë për të ruajtur dhe mbrojtur integritetin sportiv të garave në të gjithë botën”, ka thënë i pari i futbollit.
Sipas rregullave të qeverisë në Mbretërinë e Bashkuar, lojtarët do të humbnin disa ndeshje për shkak të periudhës 10-ditore të izolimit që kërkohet kur kthehen në Mbretërinë e Bashkuar.
