FIFA gjobiti Federatën Shqiptare të Futbollit pas sjelljes diskriminuese të tifozëve shqiptarë gjatë ndeshjes kualifikuese për Botërorin 2026 ndaj Andorrës, e zhvilluar në stadiumin “Arena Kombëtare” më 24 mars 2025.
Komisioni Disiplinor i FIFA-s e konsideroi të papranueshme sjelljen e tifozëve dhe ka vendosur një gjobë prej 20 mijë frangash zvicerane ndaj FSHF-së si edhe mbylljen e të paktën 20% të stadiumit në ndeshjen e radhës së Shqipërisë në kompeticionet e FIFA-s, me prioritet në tribunat pas portave.
Një lajm që nuk u prit mirë në opinionin sportiv dhe pati reagim të fortë nga grupimet e tifozëve.
Po çfarë ka ndodhur saktësisht në duelin me Andorrën, që “detyroi” FIFA-n të reagonte me “dorë të hekurt” ndaj FSHF-së?
Siç shihet në dokumentet e FIFA-s pas procesit disiplinorë ka të bëjë me disa thirrje të tifozëve shqiptarë kundër Serbisë.
Saktësisht në orën 20:48, 3 minuta pas fillimit të sfidës me Andorrës është dëgjuar në kor nga tribuna N103, ku janë pozicionuar edhe tifozët kuqezi thirrje “Vriti, vriti, vriti serbët”. Thirrje këto që sipas FIFA-s kanë zgjatur diku tek 15-20 sekonda, ndërsa kjo ka nxitur urretje ndëretnike dhe dhunë ndaj serbëve.
Në shënimet që ka mbajtur në dosje delegati, tregohet fare mirë sektori, minuta dhe thirrjet e regjistruara me video në gjuhën shqipe, të cilat janë përkthyer në atë angleze, sa kanë zgjatur ato dhe sa herë janë përsëritur.
Por jo vetëm kaq, pasi delegati i sfidës ka paraqitur një tjetër incident të ndodhur në këtë sfidë. Në orën 20:50 e njëjta këngë është përsëritur sërish në minutën e 5-të. Thirrje këto të ardhura po nga tribuna pas porte N103. Këtë herë thirrjet kanë zgjatur 10 sekonda dhe sipas delegatit nuk ka pasur asnjë reagim nga lojtarët apo pjesëtarët e tjerë të ndeshjes.
Më datën 2 prill, FSHF-ja është informuar për diçka të tillë dhe pas disa ditëve ka ardhur dhe vendimi për “mbylljen” e 20 % të stadiumit për ndeshjen e ardhshme.
Ndërkohë vlen të theksohet sipas vendimit të dhënë nga FIFA, 20% mund të mbushet me grupe të komunitetit ose organizata kundër diskriminimit, me miratim paraprak nga qeveria botërore e futbollit.
Gjithashtu, brenda 6 muajve, FSHF duhet të hartojë dhe të paraqesë një plan të përmirësuar kundër diskriminimit që duhet të miratohet nga FIFA.
Incidentet
1-Në shkresën e hapjes së procedimit disiplinor nga Komisioni i Disiplinës në FIFA, sqarohet shumë qartë me detaje se pse është marrë ai vendim ndaj FSHF-së. Është faktuar nga delegati i ndeshjes me Andorrën në “Arenën Kombëtare”, që në fillimin e takimit nga tifozë shqiptarë, ku jepet edhe sektori përkatës apo edhe minuta e incidentit, se nga kanë ardhur ato thirrje diskriminuese.
2-“Incidenti ka nisur në anën veriore të stadiumit, përkatësisht në sektorin N 103, nga tifozët shqiptarë, në orën 20:48, minuta e tretë e ndeshjes. Tifozët shqiptarë kanë kënduar këngë ksenofobike. Një grup prej afërsisht 50 tifozësh të pozicionuar në anën veriore, blloku N103 këndonin: ‘Vriti, vriti, vriti serbët’. Kënga ka zgjatur rreth 15-20 sekonda. Kënga ‘Vriti, vriti, vriti serbët ka nxitur urrejtjen ndëretnike dhe dhunë ndaj etnisë serbe. Nuk pati asnjë reagim nga lojtarët ose zyrtarët e ndeshjes (përfshirë arbitrat) ose tifozët. Ky incident nuk u përsërit”, është shkruar në procedimin disiplinor.
Discussion about this post