Një tërmet i dytë i fortë tronditi sot Filipinet jugore, më pak se 12 orë pasi një goditje me magnitudë 7,4 ballë Rihter shkaktoi vdekjen e të paktën gjashtë personave.
“Goditja e dytë kishte një magnitudë 6,9 ballë Rihter dhe epiqendra e saj ishte gjithashtu pranë qytetit Manay në provincën Davao Oriental”, sipas Institutit Filipinez të Vullkanologjisë dhe Sizmologjisë (PHIVOLCS).
PHIVOLCS lëshoi një paralajmërim për cunami dhe u bëri thirrje banorëve të komuniteteve bregdetare nga provincat Surigao Del Sur, Davao Orienta dhe Surigao Del Norte të evakuoheshin menjëherë në zona më të larta.
Njoftimi paralajmëroi se valët e para të cunamit do të mbërrinin sot në mbrëmje deri në orën 21:12. “Ky është një tërmet i ndryshëm. Nuk është një pasgoditje,” tha drejtori i PHIVOLCS, Teresito Bacolcol.
“Tërmeti me magnitudë 7,4 ballë Rihter u regjistrua sot në orën 9:43 të mëngjesit pranë bregdeti të Davao Oriental, rreth 1,000 kilometra në jug të Manilës”, sipas PHIVOLCS. Kjo bëri që njerëzit të largoheshin nga ndërtesat dhe i nxiti autoritetet të lëshonin një paralajmërim për cunami.
PHIVOLCS, fillimisht raportoi një tërmet me magnitudë 7,6 ballë Rihter, por më vonë e rishikoi atë në 7,4 ballë Rihter, në përputhje me Sondazhin Gjeologjik të SHBA-së (USGS).
Tërmeti u regjistrua pak më shumë se një javë pasi një tërmet me magnitudë 6,9 ballë Rihter – tronditi provincën qendrore të Cebusë, rreth 515 kilometra larg, duke shkaktuar vdekjen e të paktën 74 personave dhe plagosjen e 559 të tjerëve.
Discussion about this post