Forcat izraelite thonë se armëpushimi ka hyrë në fuqi ndërsa trupat përfundojnë tërheqjen fillestare. Armëpushimi ka hyrë tashmë në fuqi, njofton ushtria izraelite (IDF).
Në një deklaratë të publikuar në Telegram, IDF thotë se trupat “kanë filluar të pozicionohen përgjatë vijave të reja të vendosjes” që nga ora 12:00 me orën lokale.
“Trupat e IDF në Komandën Jugore janë vendosur në zonë dhe do të vazhdojnë të eliminojnë çdo kërcënim të menjëhershëm,” shtohet në deklaratë.
Ndërkohë banorët në pjesën veriore dhe perëndimore të qytetit të Gazës janë tronditur ndërsa forcat izraelite janë tërhequr nga disa lagje, duke zbuluar shkatërrim të paparë pas javësh të tëra bombardimesh dhe rrënimesh.
Për herë të parë pas javësh, njerëzit kanë hyrë në zonat “Sheikh Radëan”, “al-Karama” dhe “Beach Camp”, vetëm për të gjetur blloqe të tëra banesash të rrafshuara, qindra shtëpi të shkatërruara dhe pjesën më të madhe të infrastrukturës së zonës të zhdukur.
Dhjetëra video që qarkullojnë në rrjetet sociale tregojnë banorë që ecin mes rrënojave dhe filmojnë çfarë ka mbetur nga lagjet e tyre.
Në një video, dëgjohet një burrë duke thënë: “Ky është vendi i fundit ku mund të arrijmë. Ushtria izraelite është ende afër. Shikoni shkallën e shkatërrimit, i kanë shkatërruar të gjitha.”
Ndërsa disa banorë ishin të zënë duke filmuar rrënojat, të tjerë nxituan për t’u ardhur në ndihmë ekipeve të Mbrojtjes Civile të Gazës, të kontrolluara nga Hamasi, në nxjerrjen e trupave nga nën rrënoja.
Zëdhënësi “Mahmoud Basal” i tha BBC-së se tetë trupa u nxorën nga Gaza Veriore mëngjesin e së premtes, ndërsa ekipet e shpëtimit vazhdojnë kërkimet “me mjete shumë të kufizuara” në zona të tjera.
Pamje të ngjashme janë raportuar në disa distrikte të tjera të braktisura nga forcat izraelite, të cilat kanë filluar tërheqjen drejt vijave të rëna dakord në kuadër të marrëveshjes së armëpushimit të negociuar në “Sharm El-Sheikh” midis Hamasit dhe Izraelit.
Rreth 700,000 persona të zhvendosur nga qyteti i Gazës dhe veriu tani presin me ankth që tërheqja të përfundojë, në mënyrë që të mund të kthehen në atë që ka mbetur nga shtëpitë e tyre.
Alaa Saleh, një mësues që u arratis me bashkëshorten dhe gjashtë fëmijët e tij në Khan Younis tre javë më parë, i tha BBC-së se mezi pret të kthehet në veri sapo të hapet rruga bregdetare:
“Shtëpia ime u shkatërrua një vit më parë. Unë po jetoja në një tendë mbi rrënoja dhe do të kthehem për ta ngritur përsëri tendën. Ne thjesht duam të rindërtojmë. Jemi lodhur duke jetuar në tenda që nuk na mbrojnë as nga nxehtësia e verës, as nga i ftohti i dimrit.”
Discussion about this post