Fillon Champions League me formatin e ri, spikat supersfida Milan-Liverpool -

Mbrëmja e sotme do të shënojë fillimin e sezonit të ri i Ligës së Kampionëve, i cili mund të thuhet se është historik në shumë aspekte.

Nga ky sezon, garat elitare evropiane për klube nuk do të jenë në formatin e saj të njohur me tetë grupe nga katër skuadra, gjë që sigurisht do të marrë pak kohë për mësim.

Është rritur edhe numri i skuadrave, kështu që këtë sezon 2024/25 në Ligën e Kampionëve në vend të 32 do të shohim 36 skuadra që do të jenë të gjitha së bashku në një tabelë.

Në pjesën e garës së ligës, secila skuadër do të luajë nga tetë ndeshje kundër kundërshtarëve që u tërhoqën në shortin e 29 gushtit dhe tetë skuadrat e para do të kalojnë direkt në fazën e 1/8-tës. Ekipet nga vendi i 9-të në të 24-të pas tetë xhirove të luajtura do të kalojnë në ‘play-off’ për një vend në fazën e 1/8-tës.

12 skuadrat e fundit në tabelë do të përfundojnë pjesëmarrjen në Evropë këtë sezon, çka do të thotë se nuk ka më transferim në Ligën e Evropës siç ishte në sezonet e mëparshme.

Turi i parë i Ligës së Kampionëve do të luhet nga e marta në të enjte, ndërsa shtatë të tjerat, si më parë, gjatë të martave dhe të mërkurave.

Raundi i fundit është caktuar për 29 janar, ndërsa faza e eliminimit fillon më datë 11 shkurt. Finalja e madhe do të luhet më 31 maj në Allianz Arena të Mynihut.

E ndërsa formati i garës është i ri, favoritët për titull janë ende të njëjtat klube.

Manchester City, Real Madrid, Arsenal dhe Bayern Munich janë në krye të listës sipas shtëpive të basteve, ndërsa Interi, Barcelona, Liverpooli dhe Paris Saint-Germain shihen si favoritë të fshehur.

Adhuruesit e futbollit do të kenë mundësi të shohin përballje interesante mes ekipeve.

Në program do të jenë gjithsej gjashtë ndeshje, dy që startojnë në 18:45: Juventus – Psv Eindhoven dhe Young Boys Aston Villa.

Ndërsa katër ndeshje të tjera do të fillojnë nga ora 21:00.

Supersfida e kësaj mbrëmje parashihet të zhvillohet në “San Siro” në mes të Ac Milan dhe Liverpoolit.

Po ashtu lojë interesante pritet të jenë edhe ndeshjet në mes të Bayern Munchen dhe Dinamo Zagreb, Real Madrid – VFB Stuttgart dhe Sporting – Lille.