Ministri i Brendshëm Bledi Çuçi ka dalë në një konferencë për mediat ku ka bërë një tjetër apel për qytetarët lidhur me 25 majin, ku do të zhvillohet në Tiranë finalja e Conference League.
I shoqëruar nga drejtori i Policisë së Shtetit, Gledis Nano, Çuçi bëri thirrje që qytetarët të cilët nuk kanë një biletë të mos vijnë në Tiranë. Po ashtu ai u kërkoi bankave dhe bizneseve private që ta bëjnë pushim të mërkurën. Ndërkohë, ministri sqaroi se ata që duan të dalin nga Tirana, do t’ju mundësohet një gjë e tillë përmes korridoreve të daljes.
“Pasnesër me rastin e finales së Konferencë Ligës mes Romës dhe Feyenoordit. Jemi këtu dhe do të jemi këtu për të kthyer atë ditë në një festë për Tiranën. Të parashikojmë çdo gjë me detaje që të mos cënohet askush në këtë festë të madhe. Të gjithë shqiptarët që nuk kanë biletë të mos tentojnë të vijnë në Tiranë sepse Tirana në atë ditë do jetë në dispozicion të tifozëve. Gjithashtu u bëj thirrje të gjithë bizneseve të tjera apo zyrat e ndryshme private si bankat apo të tjera biznese ta shpallin të mërkurën ditë pushimi pasi e gjithë lëvizja në Tiranë do jetë e paralizuara. E përsëris edhe njëherë mos hajdeni në Tiranë nëse nuk keni biletë”, tha ministri.
Pas dy ditësh të gjitha institucionet publike do të jenë të mbyllura përfshirë edhe ato arsimore, ndërsa pritet të ketë një numër të madh tifozësh për të mbështetur dy skuadrat finaliste, Roma dhe Feyenoord.
Discussion about this post