Sytë sot janë në “Wembley” në finalen e madhe të FA Cup midis Manchester Cityt dhe Manchester United, derbi i parë i Mançesterit, në finalen e FA Cup. Kampionët e Anglisë, vijnë si favoritë në këtë sfidë, pasi ata synojnë të sigurojnë trofeun e dytë sezonal, për të tentuar më pas tripletën, një sukses që vetëm rivalët e përjetshëm të United e kanë arritur më parë në ishull (1999).
Djemtë e Guardiolës e kanë fituar për herë të fundit titullin e Fa Cup në vitin 2019, ndërsa këtë sezon, ky trofe merr një rëndësi të madhe, pasi në Angli konsiderohet si prova e vërtetë e “Citizens” përpara finales së madhe të Stambollit, më 10 qershor, kundër italianëve të Interit për Champions League.
Në anën tjetër skuadra e Erik Ten Hag synon të fitojë trofeun e dytë sezonal, pas suksesit në Carabao Cup. “Djajtë e kuq” nuk i kanë fituar kurrë më parë në historinë e tyre dy trofetë e kupave angleze, por ata vijnë në këtë sfidë pas një serie prej katër fitoresh radhazi, duke e mbyllur në vendin e tretë në Premier League.
Në historinë e FA Cup, vetëm Arsenali ka bërë më mirë se United. “Djajtë e Kuq” e kanë fituar 12 herë këtë trofe, ndërsa “Topçinjtë” kryesojnë me 14 tituj. Për herë të fundit, United triumfoi në FA Cup në 2016. Ndërsa në 19 vitet e fundit, “Djajtë e Kuq” kanë triumfuar vetëm një herë në këtë kompeticion.
Në këtë sezon do të jetë ndeshja e tretë mes Cityt dhe United. Skuadra e Erik Ten Hag është përballur dy herë me kampionët e Anglisë në kampionat, këtë sezon. Sfida e parë foli për të besuarit e Guardiolës që shkatërruan United 6-3, ndërsa në Old Trafford, skuadra e trajnerit Erik Ten Hag fitoi me rezultatin 2-1 (me shumë polemika).
Finalja e FA Cup do të startojë në orën 16:00.
Discussion about this post