Gazetari i “Ansa”-s, Alessandro Castellani ka komentuar finalen e Conference League, e cila do të zhvillohet më 25 maj në stadiumin “Air Albania”, në Tiranë.
Sipas gazetarit italian dita e finales duhet të menaxhohet me kujdes duke qenë se në kryeqytetin shqiptar do të zbarkojnë mijëra tifozë të cilët nuk e kanë siguruar një biletë për në stadium dhe policia duhet të jetë e përgatitur për këtë ngjarje. Gazetari italian ngre alarmin edhe për 8 apo 9-fishimin e çmimit të biletave të avionëve.
“Pavarësisht deklaratës së trajnerit të Feyenoord sipas të cilit, skuadra e tij është më e fortë se Roma, unë nuk e mendoj kështu sepse mendoj që verdhekuqtë janë të avantazhuar edhe pse në një finale nuk i dihet asnjëherë se çfarë ndodh.
Jam pak i shqetësuar për atë që mund të ndodhë në Tiranë sepse shumë shumë njerëz nga Roma dhe Rotterdami do të shkojnë aty pa biletë dhe edhe pse ambasadori italian në Tiranë tha që do të ngrihen dy zona fansash, nuk dihet asnjëherë. Besoj dhe shpresoj që policia e Tiranës të jetë gati për një gjë të tillë.
Unë mund të marr një shembull. Kompanitë ajrore që zakonisht presin bileta Romë-Tiranë me 100 euro, këtë herë e di që kompania ku unë punoj, ka paguar 800 euro.
Edhe hotelet i kanë rritur shumë çmimet por kjo ndodh përherë në raste të tilla kur ka ndeshje finale. Unë në vitin 2010 në Botëror pagova për një hotel në Afrikën e Jugut 4-fishin e asaj që paguhej zakonisht për atë vend. Dua të them që kjo gjë nuk ndodh vetëm në Shqipëri”.- u shpreh gazetari.
Discussion about this post