Ndonëse Policia e Shtetit e ka mohuar zyrtarisht që të Gledis Nano të ketë dhënë dorëheqjen, burime pranë qeverisë bëjnë me dije se është zgjedhur dhe pasaardhësi i tij. Sipas informacioneve të sigurta pranë qeverisë, Gledis Nano do të zëvendësohet nga Muhamet Rrumbullaku, drejtori i Agjencisë së Mbikëqyrjes Policore.
Rrumbullaku është një rikthim në strukturat e Policisë së Shtetit, pas një karriere të gjatë ku për shumë vite ka qenë Zv/Drejtori i Përgjithshëm i Policisë për Rendin dhe Sigurinë Publike 2009-2013, ndërsa më parë ka qenë Drejtor i Policisë së Tiranës dhe në disa qarqe të tjera. Gjatë qeverisë teknike të vitit 2017 , Rrumbullaku u emërua për disa muaj, këshilltar i Ministrit të Brendshëm Dritan Demiraj.
Megjithatë, derisa kjo të firmoset dhe zyrtarizohet nga kryeministri Rama, i cili është personi që emëron ose largon nga detyra Drejtorin e Përgjithshëm të Policisë së Shtetit, lëvizja e bujshme në Policinë e Shtetit mbetet vetëm në kuadrin e diskutimit.
Ky zyrtarizim pritet të realizohet ditën e mërkurë në mbledhjen e radhës të qeverisë, ndërsa pikëpyetje të mëdha ngrihen për këtë lëvizje për shkak të raporteve me ambasadën e SHBA, duke qenë se Nano ishte një nga të preferuarit e amerikanëve.
Discussion about this post