Kryetari i Këshillit Kombëtar të PD, Edi Paloka, ka dalë sot me një propozim të ri, që sipas tij do mund të zgjidhë ngërçin më firmat për Kuvendin. Paloka tha se ai i ka propozuar të dy palëve që të zgjedhin nga një përfaqësues dhe të verifikojnë firmat.
Por, këtu ai thekson se problemi është që palët nuk kanë besim as mes njeri- tjetrit. Sipas tij, nëse pala tjetër refuzon të nxjerrë një përfaqësues për të bërë verifikimet, atëherë do të thotë qartë që nuk pranon që ky proces të ecë përpara. “Më duket propozim i arsyeshëm për hijet e dyshimit që janë mes palëve. Le të vijnë të ulen nga një përfaqësues të marrin fletët dhe të verifikojnë. Nëse thonë nuk duam, i bie që nuk duan. Nëse janë mbledhur 4.200 firma të delegatëve dhe thuhet nuk e njoh Kuvendin, këtu nuk ka fjalë për komente. Sapo e deklarova që ky është propozimi që unë po bëj dhe e kam diskutuar me palët.
Të dy palët të caktojnë nga një person të besueshëm të tyre. Unë hodha si ide që mund të jetë nga njëra anë sekretari zgjedhor, e nga ana tjetër sekretari organizativ. Të marrin formularët e të verifikojnë që janë apo jo delegatë dhe kanë firmosur apo jo. Kështu do të mbyllej kjo histori. Jemi në kushtet e palëve. Si do e votojë kryesia e partisë diçka që duket në dritë të diellit. Nëse vërtetojnë që 4.200 delegatë kërkojnë mbledhjen e Kuvendit, nuk ka rëndësi as kryetar e asnjë tjetër”, tha Paloka.
Në përfundim ai kërkoi edhe njëherë që, të dyja palët mund të caktojnë nga një njeri të besuar, në të kundërt do tregojnë se nuk janë pro zgjedhjeve me vullnet të lirë dhe ndryshimeve në paqe.
Discussion about this post