Nga 1 tetori i këtij viti akademik 2021-2022, arsimi i lartë publik në Kosovë do të jetë pa pagesë për studentët në nivelin bachelor dhe master.
Ky vendim është nënshkruar sot nga ministrja e Arsimit, u komunikua nga kryeministri Albin Kurti e Arbërie Nagavci, të cilët u shprehen se po jetësohet një zotim i tyre.
Kryeministri i Kosovës, Albin Kurti, tha se ky vendim do të ndikojë në barazinë sociale në vend, derisa tha se është një përmbushje e zotimit se arsimi duhet të jetë falas për të gjithë.
“Nga 1 tetori i këtij viti duke filluar prej vitit akademik 2021/2022 arsimi i lartë publik në Kosovë do të jetë pa pagesë për të gjithë ata që dëshirojnë të studiojnë në nivelet bachelor dhe master, ndërsa për studentët e doktoratës do të ketë lehtësi të veçanta. Kjo padyshim se kontribuon në barazinë sociale në vend” – është shprehur Kurti.
Vendimi është nënshkruar nga Ministria e Arsimit, Shkencës, Teknologjisë dhe Inovacionit Arbërie Nagavci, dhe që mundëson arsimin e lartë të bëhet njësoj i aksesueshëm për të gjithë.
