Teksa po raportonte kontrollet e javëve të fundit nga drejtoria Antikorrupsion , ministri Ulsi Manja tregoi se Prokuroria ka nisur hetimet për 4 punonjës të gjendje civile në Tiranë. Sipas të dhënave, një shtetase ka realizuar martesë me një person të burgosur në Itali, kundrejt pagesës që iu ka dhënë punonjësve të gjendjes civile për ta firmosur certifikatën e martesës.
“Rasti i parë i përket B.H, e cila ka realizuar një martesë fiktive mes një të burgosur në shtetin italian dhe një qytetareje shqiptare, kundrejt pagesës. Në procesverbalin e formuluar nga zonja, bashkëshorti që në fakt ndodhej në burg ne Itali, figuron si i pranishëm këtu në Tiranë. Puna e Drejtorisë Antikorrupsion ka nisur pasi zonja që figuron bashkëshorte, ka bërë një ankesë për zhbllokimin e dokumenteve biometrikë. Pas kësaj ankese, nga specialistët e drejtorisë sonë ka nisur hetimi që ka rezultuar në këtë falsifikim kundrejt shpërblimit nën dorë. Kemi bërë kallëzimin në prokurori për falsifikim dokumentesh nga punonjësi i gjendjes civile dhe shpërdorim detyre”, tha ai.
Ndërkohë, Manja thekson se rasti tjetër i abuzimit me detyrën është po në këtë institucion. 3 punonjës të tjerë të gjendjes civile në Tiranë po hetohen nga Prokuroria pasi kanë falsifikuar dokumentet e martesës së një shtetaseje, që t’i siguronin asaj letrat angleze. “Rasti I dytë ka të bëjë sërish me gjendjen civile këtu në Tiranë. Shtetaset S.A, E.T, dhe E.N, janë kallëzuar në prokurori me akuzën e falsifikimit të dokumenteve nga nëpunësi i gjendjes civile dhe shpërdorim detyre. Zonjat në fjalë, në bashkëpunim me njëra -tjetrën kanë falsifikuar aktet e gjendjes civile për martesa.
Janë ato martesat për të cilat ju keni dëgjuar, pra rëndom quhen për të marrë dokumentet angleze. Sepse këto martesa dyshohet se janë bërë pas dhënies së ryshfetit kundrejt këtyre punonjësve. Pas verifikimeve që kanë bërë specialistët e Drejtorisë së Antikorrupsionit, çështja është kallëzuar në Prokurori”, tregoi Manja. Ndërkaq, bëhet me dije se hetimet vazhdojnë dhe persona të tjerë po ndiqen penalisht.
Discussion about this post