Në lidhje me fiskalizimin, ka reaguar ditën e sotme deputetja e zgjedhur e Partisë Demokratike, Emilia Koliqi. Përmes një postimi në facebook, Koliqi thotë se Shqipëria është vendi i vetëm në rajon, i cili po aplikon sistemin e fiskalizimit, një sistem i monitorimit të të dhënave të biznesit.
Më tej ajo shton se fiskalizimi që në fillim është propaganduar nga qeveria si një sistem, që më në fund do zhdukë informalitetin dhe do të sjellin më shumë të ardhura në buxhetin e shtetit. Por, asnjëherë nuk u bë transparencë për shifrat, se sa do të ishte përfitimi në buxhetin e shtetit nga kjo reformë.
Deputetja e PD shprehet se faturimi i ri do të zbatohet nga 90 mijë biznese, ku në këtë kategori pjesa më e madhe janë biznese të vogla, të cilat vazhdimisht janë shprehur se nuk janë gati për të qenë pjesë e këtij sistemi, sepse nuk mbulojnë dot kostot e tij.
“Duke filluar nga regjistrimi, pra marrja e certifikatës së fiskalizimit, kasat e reja ose përshtatja me softëare, garancia e internetit për çdo biznes, blerja e kompjuterave, printerave, mirëmbajtja e tyre, punonjës shtesë me ekspertizën e duhur për të aksesuar programet etj, janë shpenzime shtesë në vit për çdo biznes. Dhe të gjitha këto, pasi kemi kaluar periudha mjaft të vështira, si tërmeti dhe pandemia globale COVID-19, nga e cila nuk kemi dalë akoma” – thuhet në reagimin e saj.
Koliqi gjithashu thotë se, për gjithë këtë rritje të kostos së administrimit dhe shpenzimeve për kompletimin e infrastrukturës, qeveria nuk merr përsipër asnjë kompensim ndaj bizneseve, në një kohë që ky proces është ndërmarrë, që t’i shërbejë vetëm asaj. Sipas deputetes, kjo qeveri është një armike e betuar e sipërmarrjes së ndershme private, dhe procesi i fiskalizimit do të jetë një instrument për të vënë në vështirësi bizneset, kryesisht të vogla dhe për t’i falimentuar ato.
