Kryetari demokrat i Bashkisë Kavajë, Fisnik Qosja, po bashkëpunon pa “komplekse” me një të dënuar për korrupsion, të cilit sapo i ka falur tenderin. Abuzimi me fondet e prokuruara e bëjnë Qosjen të mos dallojë nga paraardhësit e tij të majtë dhe të djathtë.
Kryetari Qosja ka firmosur më datë 8 nëntor 2023 tenderin me objekt “Furnizimi me ushqime për kopshte, çerdhe dhe konviktorë”. Për një afat 10 muaj dhe do të shpenzohen 120 milionë lekë. Këto shpenzime janë të domosdoshme për ushqimin e fëmijëve, por lekët rrezikohen nga përvetësimi, para se të furnizohen kopshtet dhe çerdhet.
Nga monitorimi i Open Data Albania të bie në sy “Flamuri i kuq” që i është vendosur tenderit. Kjo shenjë tregon riskun e lartë të korrupsionit që ka kjo procedurë prokurimi.
“NELSA ” SHPK dhe “BIO TRADE ALBANIA ” SHPK janë dy firma që kanë paraqitur ofertat e tyre për këtë tender. Por, kjo e fundit u përjashtua nga gara që në fillim, ndërsa në fazën e zhvillimit të tenderit mbeti vetëm firma ‘NELSA ” SHPK. Kështu, “Nelsa” u shpall fituese pa konkurrencë dhe përfitoi kontratën e majme.
Arrestimi
Sakaq, shohim se Qosja ka zgjedhur njeriu e duhur për të zhvilluar këtë aferë. Kompania “NELSA ” SHPK tashmë është në pronësi të Elsa Kamberi (Balla), por themeluesi dhe pronari i saj i vërtetë është Nexhmi Balla, babai i Elsës, biznesmen i njohur për aferat e tij me zyrtarët. Ai është dënuar për korrupsion dhe vjedhje të fondeve publike.
Në 11 Korrik 2016, Policia e Shtetit arrestoi biznesmenët Ylber Kalaja, Nexhmi Balla dhe Shemsi Sinani, pasi Prokuroria për Krime të Rënda kishte zbuluar një rast korrupsioni në tenderët e ushqimeve për Drejtorinë e Përgjithshme të Burgjeve, ku ishin përfshirë kompanitë e tyre “Vllaznimi” (sot, “Dajti Park 2007”); “Nelsa” dhe “M.B Kurti” (sot “Sinan Trading”).
Së bashku me biznesmenët, me urdhër të Prokurorisë u arrestuan në atë kohë edhe drejtori i përgjithshëm i Burgjeve, Artur Zoto dhe zëvendësi i tij, Iljaz Labi.
Pas arrestimeve, biznesmenët Kalaja, Balla dhe Sinani morën masat për të siguruar vijimësinë e kompanive të tyre, duke ua kaluar administrimin personave të afërt me ta. Balla ia ka kaluar vajzës së tij.
Tërshërë, pluhur pjekjeje dhe trahana me shumicë
Në listën e ushqimeve që do të furnizohen kopshtet dominojnë me sasi të mëdha produkte që përdoren pak ose aspak për fëmijët. Në dokumentet standarde të tenderit shohim se është një listë e gjatë me produkte ushqimore, ku një pjesë e mirë e tyre konsumohen shumë rrallë nga fëmijët në kopsht, dhe pothuajse fare nga fëmijët në çerdhe. Shohim se do të blihen në sasi të madhe tërshërë, miell misri, pluhur për pjekje, limonë, që përdoren në një sasi të reduktuara tek fëmijët.
Sidomos pluhuri i pjekjes nuk është shumë i këshillueshëm. Ndërsa në bie në sy se do të përdoren edhe 5 mijë kg bukë integrale, që gjithashtu është një sasi e madhe për t’i shërbyer fëmijëve deri në 5 vjeç.
Ndërsa janë edhe një sërë frutash dhe produkte të tjera, si kanellë, djathë kaçkavall, fruta të ndryshme, për të cilat prindërit thonë se nuk iu jepen fare fëmijëve. Në kopshtet shtetërore shpesh mëngjesi është shumë i vakët, dreka kryesisht ndonjë supë.
Gjithsesi vetëm Qosja dhe Balla mund të na sqarojnë se si e kanë përpiluar këtë listë ushqimesh dhe për sa fëmijë është planifikuar blerja. Sepse nuk është çudi që Qosja të ketë blerë tërshërën (1000 kg), trahana (400) që mund t’i ketë mbetur stok Ballës nëpër magazina.
Lexo edhe:Denoncimi në KPP/ Ulsi Manja firmos 613 mln lekë për reçel dhe erëza për Burgjet
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post