Abuzimet me dokumentat e një tenderi me fond limit 2.2 milionë euro të Arkivës së Shtetit e kanë penalizuar rëndë kompaninë “Adel Co”, në pronësi formale të Kliti Avdullari, por që besohet se pas tij fshihet biznesmeni Arjan Lleshi.
Në 11 Korrik 2025, Agjencia e Prokurimit Publik (APP) ka vendosur përjashtimin e shoqërisë së shtypshkrimit dhe prodhimit të letër-kartonave, “Adel Co” për një vit nga pjesëmarrja në tendera.
APP thotë në vendimin nr. 51 të saj se arsyeja e përjashtimit të shoqërisë private nga e drejta për të marrë pjesë në procedurat të prokurimit publik është fakti që “ka keqinformuar për qëllime kualifikimi” në tenderin e zhvilluar nga Drejtoria e Përgjithshme e Arkivave në vitin 2023, me objekt “Blerje kuti dhe dosje për ruajtje të përkohshme”, me fond limit 227.210.205 lekë të reja (rreth 2.2 milionë euro).
Sipas Agjencisë së Prokurimit Publik, hetimi administrativ ka nisur pas ankesës së një shoqërie tjetër pjesëmarrëse në atë tender. Në përfundim, APP ka konstatuar problematika në dokumentacionin e përdorur nga “Adel Co” dhe ka vendosur përjashtimin e saj për 12 muaj nga pjesëmarrja në tendera publik.
Historia e tenderit të Arkivave vijon prej më së paku dy vitesh. Në këtë histori ka dyshime se është përfshirë edhe Komisioni i Pavarur i Kualifikimit (KPP), i cili, nën drejtimin e Jonaid Myzyrit, i dha të drejtë më herët shoqërisë “Adel Co”.
Në vijim, kompania që rezultoi humbëse në atë tender, iu drejtua me kallëzim Prokurorisë së Posaçme në shkurt të vitit 2025, ku kërkonte hetimin e të gjithë anëtarëve të Komisionit të Prokurorimit Publik, nën dyshimet se kanë favorizuar shoqërinë me “pronar në hije”, Arjan Lleshin.
Në kallëzim, ndër të tjera thuhej se “Kliti Avdullari (pronari në letra) është thjesht një prestanome, pronari faktik është Arjan Lleshi dhe Arjan Lleshi në bashkëpunim dhe me të tjerë ka ndikuar në vendimarrjet e KPP në favor të subjektit Adel CO”.
Ky tender është denoncuar publikisht edhe nga Partia Demokratike në mars të vitit 2025.
Shoqëria “Adel Co” është regjistruar në vitin 2012, në emër të Reshit Koni. Aktualisht rreth 70 vjeç, Koni, krahas faktit që rezultonte pronar, është parë nga punonjësit e shtypshkronjës punë të rëndomta, si hamall, kontrollor punëtorësh, madje edhe roje nate, duke krijuar dyshimet se ai nuk ishte ortaku real i shoqërisë “Adel Co”.
Në vitin 2017, “pronari” Reshit Koni ia dhuron të gjithë aksionet e shoqërisë Arjan Lleshit. Më pas, Koni mban postin e drejtorit të burimeve njerëzore në këtë kompani.
Dy vjet më pas, Arjan Lleshi ia dhuron kompaninë Kliti Avdullarit. Në listën e pagave të vitit 2021, të “rrjedhur” në publik, Avdullari rezultonte drejtor i përgjithshëm i shoqërisë “Adel Co”, me një pagë vetëm 30 mijë lekë të reja në muaj.
Gjithësesi, prej asaj kohe, dokumentat publikë të Qendrës Kombëtare të Biznesit tregojnë se Avdullari vijon të jetë aksioneri kryesor, pavarësisht se kompanitë e tjera të së njëjtës fushë besojnë se ai shërben vetëm si mbulesë për pronarin real, Arjan Lleshi.
Shoqëria “Adel Co” rezulton të ketë krijuar një lloj situate “monopoli” në tenderat e shtypshkrimeve dhe kutive e materialeve të kartonit, më së paku tek “Posta Shqiptare”, por emri i kompanisë rezultonte fituese në prokurimet publike edhe në institucione të tjera, përfshirë Bashkinë e Tiranës, përsa kohë drejtohej nga Erion Veliaj.
Madje, të dhënat e siguruara tregojnë se ai që konsiderohet si “pronar në hije” i “Adel Co”, Arjan Lleshi, ka lidhje personale me një prej punonjësve të zyrës së prokurimit në Bashkinë e Tiranës.
Emri i asaj punonjëseje shfaqet përciptazi edhe në dosjen hetimore “5D” të drejtorëve të Bashkisë së Tiranës. Megjithatë, emri që lidhet me Arjan Lleshin nuk rezulton, të paktën deri më tani, pjesë e hetimit të Prokurorisë së Posaçme (SPAK). /Boldnews
Discussion about this post