Atletico Madrid fitoi 1-2 në fushën e Valladolit, tre pikë që i sollën titullin kampion në Spanjë. Festë e madhe tek ekipi dhe tifozët “Colchoneros”. Djemtë e Diego Simeones përmbysën rezultatin në pjesën e dytë. Triumf me vuajtje, por kjo është Atletico Madrid.
“Sa e vështirë kjo fitore, kjo është ndjesia e parë që po përjetoj. Titulli shkon për miqtë që kemi humbur dhe tifozët që nuk janë më. Fakti që u shpallëm kampionë këtë sezon, ka një shije të veçantë. Ishte viti më i mirë për të fituar titullin, ia dolëm.
Bota po përjeton një situatë të vështirë dhe të komplikuar. Për fat të mirë, ne ishim në gjendje t’u dhuronim pak gëzim njerëzve dhe tifozëve tanë. Kemi kryesuar për 32 javë, jam mirënjohës ndaj të gjithëve; atyre që kanë luajtur dhe atyre që kanë luajtur edhe më pak.
Të gjithë kanë bërë sakrifica të mëdha, e arritëm këtë objektiv bashkë si skuadër. Nisa të buzëqesh sapo arbitri fërshëlleu fundin e ndeshjes. Më erdhi natyrale, nuk e di pse. Një gëzim që lindi brenda shpirtit tim.
Të gjithë kemi zhvilluar një punë të jashtëzakonshme, edhe ata që nuk njihen apo bien në sy. Unë vazhdoj të mësoj dhe të rritem. Më vjen keq që tifozët nuk janë këtu me ne, mezi po presim t’i përqafojmë“, përfundoi trajneri kampion.
