Nottingham Forest dhe Southampton dhuruan një ndeshje shumë të bukur për të pranishmit në stadiumin e qytetit të Nottingham.
Vendasit triumfuan me rezultatin 4-3 pas një takimi që ishte i mbushur me gola dhe raste të shumta për gol nga të dyja skuadrat.
Seria e golave u hap në minutën e 18’, me Awoniyi që dërgoi në avantazh vendasit, i ndihmuar edhe nga asistimi i Johnson.
Tre minuta më vonë, përsëri i njëjti futbollist dyfishoi rezultatin për të kuqtë. Southampton rihapi takimin katër minuta më vonë, me golin e realizuar nga Alcaraz.
Megjithatë, golat nuk kishin mbaruar në këtë pjesë të parë spektakolare. Gibbs-White shënoi dhe golin e tretë për Nottingham në minutën e 44’, me penallti.
Pjesa e dytë, nisi mirë për miqtë nga jugu i Anglisë. Lyanco realizoi golin e dytë për bardhekuqtë në minutën e 51’.
Nottingham nuk e humbi përqendrimin duke realizuar në të 73’ minutë falë Danilos.
Në minutën e 90’, vendasit u duk se realizuan me anë të Felipe, por sistemi VAR i mohoi festën brazilianit, duke e anuluar golin.
Në fund pati kohë dhe për një penallti të transformuar në gol, nga Ward-Prowse.
Kjo fitore, është shumë e rëndësishme për sa i përket Nottingham Forest, që tashmë e sheh veten në kuotën e 33 pikëve, në pozitën e 16.
Nga ana tjetër, ish-klubi i sulmuesit Armando Broja, është akoma më pranë zbritjes një kategori më poshtë, duke parë që gjendet në vendin e fundit me 24 pikë./m.b /gijotina.com
Discussion about this post