Trajneri i Dinamos, Blendi Shkëmbi ka theksuar se qëllimi i ‘Bluve’ për këtë sezon është kualifikimi në kampionatet europiane.
Teksa ka folur në prag të derbit me Tiranën, për fazën e 1/8-ave për Kupën e Shqipërisë, Shkëmbi ka theksuar se do të ketë mungesa për shkak se në fundjavë është takimi tjetër me ’Bardheblutë’ për javën e tetë të Superligës.
“Është një objektiv, ndoshta edhe më i thjeshtë për të shkuar në Europë, me përqendrim dhe dëshirë duke pasur parasysh edhe kundërshtarin. Duhet një vlerësim special, për të dhënë maksimumin dhe për të kaluar turin. Mendoj se do të kemi dy apo tre mungesa, se janë ndeshjet afër njëra-tjetrës por janë gjëra normale. Shpresojmë deri nesër të rikuperojmë edhe ndonjë lojtar. Sofranac nuk do të jetë për këto dy ndeshje, do të donim ta kishim, por do të mundohemi me ata që kemi në dispozicion që të mos ndihet mungesa.”-tha ai.
Më tej ai shtoi se kjo sfidë është e vështirë për t’u fituar për shkak të formës së mirë të kundërshtarit, por theksoi se nuk është e pamundur.
“Janë dy ndeshje derbi që nuk mund t’i ndajmë, si me Partizanin që ishim të motivuar dhe bëmë mirë, të njëjtën gjë duam edhe nesër ndaj Tiranës. Kemi parasysh se Tirana po kalon një moment të mirë, do jetë e vështirë, por jo e pamundur. Do jetë një test për ndeshjen e pas tre ditëve në kampionat dhe mendoj që të dyja skuadrat do të kërkojnë më të mirën për të qenë në gjendje të mirë psikologjike në kampionat. Jam i përqendruar te ekipi im dhe te mungesat që mund të kemi”,-deklaroi ndër të tjera Blendi Shkëmbi.
Takimi i parë midis Dinamos dhe Tiranë do të zhvillohet këtë të mërkurë në orën 16:45 në stadiumin ‘Air Albania’./K.T/Gijotina.com
